Жюзден аслам гектар агъач жангыртылгъанды

Къабарты-Малкъарда «Агъачланы сакълау» эм «Экология» проектлени чеклеринде жыл   башланнганлы жюзден аслам гектар агъач жангыртылгъанды. Саулай алып айтханда, республиканы агъач мюлклеринде 223.5 минг чапыракълы терекчикле орнатылгъандыла.

-Къабарты-Малкъарны агъач мюлкю эм къоруулау службасы агъач фондну сакълау эм байыкъландырыу жаны бла ишин тири бардырады. Быйыл да аны кючю бла 102 гектар чакълы жерде агъач игилендирилгенди. Ол санда 47 гектарда жангыдын терекчикле салыргъа 55 гектарда уа тюрлю-тюрлю жумушла бардырырыгъа тюшгенди. Быллай ишле агъач мюлклени барысында да ётдюрюлгендиле, дейди КъМР-ни Табийгъат байлыкъла эм экология министрини орунбасары Мухамед Маремов.

Ол айтханнга кёре, агъач фондну айнытырча кёбюсюнде эмен, чынар, кюйрюч, юрге дегенча сыйлы сортла хайырланыладыла. Аланы иги кесеги «Сад памяти» деген битеуроссей акцияны чеклеринде салыннгандыла. Ол санда Май бла Лескен районлада жыйырмашар гектар орнатылгъанды. Саулай айтханда уа, Уллу Ата журт урушха чакъырылгъан адам санына кёре 60 мингнге жууукъ терек салыннганды. Битимле бла толусунлай республиканы агъач питомниги жалчытханды.

Эсге сала айтсакъ, бюгюнлюкде республиканы агъач фондуну уллулугъу 194719 гектаргъа жетеди. Аланы кёбюсюнде чапыракълы терекле ёседиле, сёз ючюн бусагъатда къаты сакъланнгын чынар 40 процент жерни алады.