Ваннаны душ кабинагъа алышындырыргъамы огъесе угъаймы?

Великобританияны  университетлерини алимлери кеслери ыразылыкълары бла тинтиулеге къатышхан эки минг адамдан соруп, бусагъатдагъыланы кёбюсю душ тюбюнде жууунуп чыгъаргъа сюйгенлерин чертгендиле. Алгъын заманда юйреннген ыз  бла бара, толгъан ваннагъа ондан бири  кирип жатады.

Специалистле ангылатханларына кёре,  душну заманларын къызгъаннганла сайлайдыла.  Исси суу бла ваннаны айыргъанланы асламысы уа тазалыкъны хыйсабындан угъай, ары ырахатлыкъ табар ючюн киредиле.  Алай  быланы экисини  да кеслерини хайырлары, кемчиликлери да барды.

Ол жукъа, къургъакъ неда чапырыргъа къоркъуулу терилери болгъанлагъа тап жарашады. Нек дегенде аны тюбюнде жуууннган адамны терисини жаланда жыйырма процент мылылыгъы къоратылынады.  Ол къанны жюрюшюн да тап халгъа келтирирге себеплик этгенин да белгилейик.  Алай анда беш минутдан кёп турургъа жарамайды. Мылылыкъны кёп тас этмез ючюн, исси суу этерге кереги жокъду. Душда гельле бла жууунуу тап келишеди.

Аладан бирлери мылылыкъгъа себеплик этген затла бла байыгъыпдыла, ала уа терини асыры бек къургъакъсыгъанына  чырмау боладыла. Гель бек кёмюк этмейди, алай тазалыкъгъа уа аны бир гитче тамычысы  окъуна тамамды.  

Душда къолугъузгъа тенгиз кырдыкладан эшилген къол къапны кийип, массаж этген да хайырлыды. Анга кёлленнген эсегиз, жюрегигиз таба сылай,  онг къолугъузну неда бутугъузну уууп тебирерге керекди. Андан сора юсюгюзге сууукъ суу къуяргъа. Ол къанны женгил жюрюуюне аламат амалды.

Саныгъызны-чархыгъызны гель бла жуугъаныгъыздан сора мылыракълай юсюгюзню  эфир жауланы бир тюрлюсю бла сымарлагъыз. Алай артда аны да суу бла чайкъап кетерирге керекди. Бу процедурадан сора  къургъакълыкъ болмаз ючюн, башха амалла этилинмеселе да, тамамды.

Саулукъгъа контраст душ да хайырлыды.  Бек игиси - ол жумуш  ингирликде этилседи.  Бир минут исси сууну тюбюнде сюелигиз, ызы бла тюз да аллай бир заманны - сууукъну. Ол халда талай кере къатлагъандан сора ахыр кереси сууукъ суу бла бошалады. Сора  жан жаулукъ бла сыйпалып,  жылы жабыугъа чёргелигиз. Ол къанны жюрюуюне, иммунитетге да игиди.

Салкъын душну шорхасы  нервала системагъа хайырлыды эмда целлюлитге да къажауду.

Ванна санлары, мышцалары киришгеннге, аякълары-къоллары  компьютер артында олтургъандан арыгъанлагъа  тап келишеди. Анга кёмюклени, эфир жауланы, кырдыкланы, тузланы, балны неда терекледе ёсген кёгетлени сууларын къошуп,  жукъларны аллында кирирге тийишлиди.

Душдача, сууу да бек исси болмасын, анга отуз беш, отуз сегиз градус жылылыкъ тамамды. Ваннадан сора лосьон, крем неда мазь бла хайырланыгъыз. Эрттенликде жуууна эсегиз, ахырында салкъын душ тюбюне киригиз.

Бу жумушха деп хазырланнган тёрели кёмюклеге терини къургъакъсытхан детергентле  (кёмюк этдириучю затла) къошуладыла. Алай болмазча уа  табийгъат эфир жауланы, тенгиз тузну, кырдык настойкаланы унутмагъыз.

Ваннаны бакъдыргъан эффекти биз суугъа къаллай аромалы  жаула къошханыбызгъа кёреди. Сёз ючюн, нарат жау къуйгъан эсегиз, ол солуу системагъа иги ингаляцияды, аны трахеитден бла бронхитден къыйналгъанлагъа файдасы уллуду. Лаванданыкъы бла мелиссаныкъы жукълаялмай къыйналгъанлагъа аламатды.

Сют ванна уа терини мылылыгъына, жюрек ырахатлыкъгъа уллу себепликди.  Аны хазырлар ючюн  суугъа ийнекникинден, эчкиникинден бир литр неда порошок халда сютден бир ненча къашыкъ къошаргъа керекди.

Темагъа кёре       

Алимле тохташдыргъанларына кёре,  териде хар кюнден жуууп кетерирге кереги болмагъан талай микроорганизм  жашайды. Сапынны хайырланып, санны-чархны терк-терк чайкъап туруу  саулукъгъа иги тюйюлдю. Нек дегенде  ол заманда терини кислотный-щелочной балансы бузулады. Алай бла анда грибокла бла бактерияладан бизни сакълагъан табийгъат смазка жокъну орунунда болуп, ол къургъакъсып, заранлы болумладан кеси кесин сакълаялмайды. Андан а битеу организмге да къыйналыргъа тюшеди.

Тинтиулени бир къаууму  уа терини ышып турса аны  D витаминни  синтезини бардырылыууна жууаплы жерлеринде чурумла чыкъгъанларын  кёргюзтгендиле.  Ол   а санны-чархны битеуюне эмда иммунитетге да къоркъуулуду. Алимлени оюмларына кёре,  саулукълу адамгъа душ тюбюне ыйыкъгъа эки кереден кёп кирирге жарамайды.  Хар кюнден тазалыкъгъа себеплик этген ишлеригиз бир-бир санларыгъызны жуууу бла чекленирге керекдиле.