Ууну кесине асырагъанды

КъМР-де МВД-ны Наркотиклеге къажау управлениясыны келечилери Нальчикде УМВД-ны патруль-пост службасыны инспекторлары бла бирге Мальбахов атлы орамда 53-жыллыкъ эр кишини тохтатхандыла. Ол алгъын да сюдню оноуу бла жууапха тартылгъаны  ачыкъланнганды.

Аны юсюн тинтгенде, право низамны сакълаучула  мор порошогу бла чулгъам тапхандыла. Экспертиза ол «героин» наркотик болгъанын, аны ауурлугъу 30,20 граммгъа жетгенин тохташдыргъанды.

Эр киши ууну кесине ичерге асырагъанын, аны сатар мураты болмагъанын айтханды.

Черекде - белгисиз тиширыуну ёлюгю  

Быйыл 3 июльда эрттенликде 8 сагъатда Бахсан черекде Бедик элни тийресинде къутхарыучула юсюнде кёп жаралары бла тиширыуну ёлюгюн тапхандыла. Ол кезиуде МЧС-ни келечилери 30 июньда суугъа кетген машинаны излегенлерин эсгертирге тийишлиди.  Тиширыу ким болгъанын эмда къалай ауушханын тохташдырыр мурат бла сюд-медицина экспертиза бардырыллыкъды.

РФ-ни Следствие комитетини КъМР-де следствие управлениясыны келечилери черекде ёлюк табылгъаны бла байламлы тинтиуле башлагъандыла.

Биягъы кеслерин алдатхандыла

Бир кюнню ичинде республиканы беш инсаны хыйлачылагъа кеслерин алдатхандыла.

24 эм 39-жыллыкъ тиширыула интернетде сатыу этгенлерини юслеринден билдириуле басмалагъандыла. Аланы сатып алама деген сылтау бла хыйлачыла аланы банк карталарыны шартларын билгендиле, алай бла аланы счётларындан 14,2 минг эмда 15 минг сом тас болгъанды.

Май райондан эмда Нальчикден 60-жыллыкъ эмда 66-жыллыкъ тиширыулагъа белгисиз адамла сёлешгендиле. Ала банкда ишлейбиз, ким эсе да счётларыгъыздан ахчаланы  урларгъа умут этгенди деп алдагъандыла. Тиширыула ахчасыз къалабыз деп къоркъуп, сёлешгенлеге карталарыны тарихлерин белгили этгендиле. Алай бла хыйлачыла аланы 157,8 минг эмда 120 минг сомларын урлагъандыла.

34-жыллыкъ акъсуучу уа Интернетде оюн валюта алама деп, 10 минг сомун тас этгенди.

Бу шартла бла байламлы уголовный ишле ачылгъандыла. Право низамны сакълаучула республиканы инсанларын сакъ болургъа, бир адамгъа да банк картагъызны шартларын билдирмезге (ол санда номерин, пин эм CVV кодларын) чакъырады.  

Ичги федерал излемлеге келишмегени ачыкъланнганды

Законлагъа бузукълукъла этип, ичги затланы сатыу-алыу бла кюрешген инсанны терслеу материалла къабыл кёрюлгендиле. Аны Нартанда юйюнде право  низамны сакълаучула федерал маркасыз ичги затла тапхандыла.

РФ-ни МВД-сыны Чегем районда бёлюмюню келечилери Россейни УК-сыны 171.3-чю статьясыны 1-чи кесегине бузукълукъла этилгенлери бла байламлы уголовный ишни ачхандыла.  

Следствие тохташдыргъаныча, Нартандан 36-жыллыкъ эр киши ичинде ичги затлары бла  700 мияла шеша сатып алгъанды. Аланы юслерине аракъыны эм шампанскийни чыгъаргъан белгили фирмаланы этикеткалары жабышдырылып,  алай энчи федерал маркалары уа жокъ эдиле.

 Продукцияны ол Нартанда энчи юйде асырагъанды. Экспертиза ол ГОСТ-ха келишмегенин тохташдыргъанды.  

Эр кишини терслеу материалла сюдню къараууна берилгендиле.

Маркалары болмагъан тютюнлени сатхандыла

КъМР-де МВД-ны экономика къоркъуусузлукъ эм коррупциягъа къажау бёлюмюню полициячылары Нальчикде сатыу-алыу комплексни ичинде орналгъан тюкенледен бирин тинтгенде, акциз эм федерал маркалары болмагъан тютюнле тапхандыла – битеу да бирге  2820 пачка. Аланы битеулю багъасы 125 минг сомгъа жетеди.

Ол кюн право низамны сакълаучула Нальчикде Пушкин атлы орамда тюкенни да тинтгендиле. Анда да федерал маркалары болмагъан 2389 пачка тютюн табылгъанды (124 минг сом багъасы).

Бу продукция 50-жыллыкъ предпринимательники болгъаны тохташдырылгъанды.

Ишеклиге РФ-ни УК-сыны 171.1-чи статьясыны 5-чи кесегине кёре терслеу материалла ачылгъандыла. Ол законлагъа бузукълукъла этип энчи маркасы болмагъан товарны чыгъаргъаны, асырагъаны, сатханы ючюн терсленеди. Бу статьягъа кёре терсленнгенни эркинлиги юч жылгъа дери сыйырылыргъа боллукъду.

 Уручулукъ этерге келгенине женгдиргенди

2016 жылда майда РФ-ни МВД-ны Элбрус  районда бёлюмюне Быллымдан 57-жыллыкъ тиширыу ким эсе да аны юйюне кирип, алтын затларын бла ахчасын урлагъанына тарыкъгъан эди. Анга 167 минг сом къоранч этилгенди.

Бу кюнледе уа оператив-излеу жумушладан сора уголовный розыскны къуллукъчулары бу аманлыкъгъа Прохладныйден бир ненча кере башы сюдлюк болгъан 29-жыллыкъ эр киши къатышханын тохташдыргъандыла.

Следствие жумушланы кезиуюнде ол быллай энтта эки аманлыкъны этгени ачыкъланнганды. Эр киши Элбрус районнга уручулукъ этерге келгенин айтханды.

Тикаланы Фатима хазырлагъанды.
Поделиться: