Агрохимикатла бал батманлагъа заран салмазча

Бал батманла тутханлагьа заран салмаз ючюн, пестицидлени эмда агрохимикатланы сабанлада къалай хайырланыргъа кереклисин юсюнден Россельхознадзорну КъМР-де эмда Шимал Осетияда Управлениясыны специалистлери билдиредиле. Ведомствода айтханларыча, эл мюлк производствода битимлени заранлы къурт-къумурсхаладан бла хансладан къоруулагъан химия препаратланы, агрохимикатланы хайырланмай болмайды. Алай аланы себиуню мардасын да унутмазгъа керекди. Нек дегенде пестицидле заранлы хансла эмда къурт-къумурсхала бла бирге бал чибинлени да къырыргъа боллукъдула.

Алай бла, пестицидле себерни аллында, бал чибинчилик мюлклеге аны юсюнден аллындан окъуна билдирирге, аны бардырыллыкъ кюнюн, заманын, химия препаратны тюрлюсюн да айтыргъа тийишлиди. Бу ишни юсюнден газетлеге жазып, жер-жерли администрациялагьа, районланы ветеринар станцияларына неда эл мюлк управлениялагъа сёлешип билдирирге да боллукъду.

Пестицидлени жел болгъанда себерге жарамайды. Бек игиси - бу иш танг аласында неда ингирде этилсе, бал чибинле учмагъан заманда. Булутлу, салкъын кюнледе да болады ол жумушну тамамларгъа.

Агъач тийреледе ёсген, кеси да чибинле букъуларын иги жыйыучу битимлеге бла гюллеге, ала чакъгъан кезиуде агрохимикатланы себерге арталлыда жарамайды. Пестицидле хайырланылгъан участкаланы тёгерегинде уа иги кёрюнюрча энчи белгиле орнатадыла. Аланы карантин кезиу ётгенден сора кетередиле.

Специалистле айтханларыча, сагъынылгъан ишлени кезиуюнде бал чибинлени батманладан тышына иймезге тийишлиди. Дагъыда аланы эм азындан жети километр ташагъа кёчюрюрге керекди. Артха уа эки ыйыкъдан сора къайтыргъа боллукъду.

Энтта да бир амал барды: пестицидлени хайырланып башлардан бир кюн алгъа батманланы бегитедиле, ичлеринде орунчукълагъа да суу къуюп. Быллай халда бал чибинлени бир ыйыкъ чакълы кечиндирирге боллукъду. Салкъыныракъ заманда уа энтта да бир-эки кюн чыдаргъа онг барды. Аны болжалы ол тийреде себилген пестицидни тюрлюсюне кёре тергеледи.