Бахчада юйчюкге закон бла ие болурча

   - Адам жеринден тепдирилмеген мюлкюне толу  ие болурча,  анга эркин  оноу этерча, къолунда тийишли  документлери болургъа керекдиле, - дейди Росреестрни КъМР-де  Кадастр палатасыны документлени жарашдырыу эм учёт бардырыу бёлюмюню таматасыны къуллугъун толтургъан Элла Блиева. 
   Белгилисича, бахчалада ишленнген юйчюклени (дачаладан башхаланы) къырал кадастр учётха быйыл биринчи мартха дери тюшюрюрге эмда регистрация этерге онг барды. Анга кёре, декларацияны кёргюзтюп, техника планны жарашдырыргъа да жарарыкъды.
   Быллай юйлени къурулушун башлардан алгъа, аны юсюнден билдирирге керекди деген жорукъ былтыр сентябрьден бери хайырланады. Алай документлени жарашдырыргъа ашыкъмагъан гражданла ючюн аны быйыл биринчи мартха дери кёчюрюрге тюшгенди.
   Эсге сала айтсакъ, быллай мюлкю болгъан адам къагъытланы хазырламай кеч къалса, аллай юйюнден къуру къалыргъа боллукъду. Законда айтылгъаннга  кёре, документлери жарашдырылмагъан объект эркинликсиз ишленнгеннге  саналлыкъды эмда аны бузуп кетерирге тюшерикди. Иш анга жетсе уа, юйню иесине эркинлигин сюдде къорууларгъа тюшерикди. Анда уа заман къоратылгъандан сора да, юй законну излемлерине келиширге керек боллукъду, кеси да иеликде болургъа.
   Кадастр эсепге тюшмеген жеринден тепдирилмеген мюлкню регистрация этерге жарарыкъ тюйюлдю. Ол себепден, биринчиден, техника планны жарашдырыргъа керекди да, аны кадастр инженер этеди. Сынамлы инженерни Кадастр палатаны бла Росреестрни «Реестр кадастровых инженеров» деген электрон сервисинде сайларгъа онг барды.   
   КъМР-ни Кадастр палатасы жеринден тепдирилмеген мюлклери болгъанла аны заманында эсепге салыргъа кереклисин эсгертеди.