Шимал наныкъ бизде иги аякъланнганды

Къабарты-Малкъарда голубиканы ёсдюрюп башлагъандыла. Республиканы Эл мюлк министерствосунда айтханларына кёре, бюгюнлюкге тийишли бахчала битеу да 56,5 гектарны аладыла.

Голубика шимал регионлада ёсген наныкъгъа саналады. Алай республиканы жеринде да иги аякъланнганды. Аграрийле белгилегенлерича, бизде хауаны болуму, жер да анга тап келишедиле, алай дагъыда битимлеге игирек къараргъа тюшеди.

Бу культура ючюнчю-тёртюнчю жылгъа тирлик берип башлайды. Беш-алты жыл озгъандан сора уа бир юлкю сегиз килограмм голубика берирге боллукъду. Ол кеси да июльда бишеди, кюзге дери къууандыргъанлай турады.

Бу иш бла кюрешип башлагъанла быйыл биринчи кере тирлик аллыкъдыла. Айтханларыча, ол артыкъ кёп боллукъ тюйюлдю, алай дагъыда голубиканы татыуун кёрюрге, аны ёсдюрюуню къыйматлылыгъын да тергерге онг берликди.

Саулай айтханда, республикада наныкъланы кёп тюрлюлеринден (юртюн, дугъум, жилек…) жыл сайын беш минг тоннадан аслам жыядыла. Келир заманлада голубика да аланы араларында тийишли жерни аллыкъды, деп ышанадыла аграрийле. Къабарты-Малкъарны эл мюлк министри Хасан Сижажев а: «Шёндю аны ёсдюрюу бла талай мюлк кюрешеди. Алай жууукъ кезиуледе аланы санына иги да къошуллугъуна, бу иш кеси да файдалы болуруна ишексизбиз. Ол айтханыбызча  болса, татыулу голубиканы бизни тюкенлерибизде асламыракъ кёрюрге боллукъду. Аны бла чекленип къалмай, тыш регионлагъа да сатып башларгъа таукелбиз», - деп къошханды. Министерствода уа келир кюзде голубиканы зыгытларын энтта да бир ненча мюлк орнатыргъа умут этгенлерин билдиргендиле.