Жилекден бай тирлик

«Жилек тала» деген эл мюлк предприятие Баксанёнок элде орналады. Шёндюледе анда къазауатда тирлик жыйыу барады, деп билдиргендиле КъМР-ни Эл мюлк министерствосундан.

Бу мюлк къуралгъанлы онеки жыл болады. Андан бери озгъан заманны ичинде ол аякъланып, айнып, саулай къыралда окъуна наныкъла ёсдюрюу жаны бла алчыланы санына киреди. Тенглешдирип айтханда, мында быллай продукциядан талай регионладан эсе кёбюрек окъуна ёсдюредиле. Сёз ючюн, былтыр теплицаладан эмда ачыкъ жерледен андан 750 тоннадан аслам алгъандыла. Быйыл а, мюлкню таматаларындан бири  Аслан Абрегов айтханнга кёре, аны бир минг тоннагъа жетдирирге умутлудула.

Алай бла шёндюгю исси кюнледе жилекни жыйыу тири барады. Кюн сайын бу ишге - 700-800, бирде уа минг адам окъуна чыгъады. Производствода семиртгичле, башха химикатла хайырланылмайдыла, заранлы къурт-къумурсхаланы уа алагъа къажау башха къумурсхаланы жайып алай къырадыла.

Жыйылгъан тирликни татыуу игирек сакъланыр ючюн сагъат бла жарымны сууукъда тутадыла, ызы бла алыучулагъа жибередиле.