Къыралдан болушлукъ – агробизнесни жетишимлилиги

Белгилисича, агропромышленный  производство экономиканы  къоркъуулу  жыл сайын уллу къоранчла сынагъан  бёлюмюне саналады.   Сёз ючюн, быйыл жайны биринчи кюнлеринде окъуна   Къабарты-Малкъарда хауаны кюйсюзлюгю – къаты жел, жауун эм буз районлада эл мюлк жерлеге заран жетдирир ючюн къоймагъандыла.  Эм бег а Бахсан, Май эм  Прохладна  районла апчыгъандыла. Саулай айтханда, 18,8 минг гектар сабанлыкъ  бла 1,4 минг гектар терек бахчалыкъ тозурагъанды.

 - Кёбюсюнде къыйын хауа болумладан къутулургъа  амал жокъду. Аны хатасындан  тирликге хата жетеди, къоранчла салады.   Бу жаны бла   агробизнесге себеплик этген шартладан бири уа страхование этиудю.  Къырал кеси жанындан программа айнырча тири кюрешгенликге, анга эм биринчиден предпринимательле кеслери эс бурургъа тийишлидиле, дейди КъМР-ни эл мюлк министри Хасан Сижажев.

Бюгюнлюкде республиканы эл мюлк производительлерини арасында  страховка этгенле аздыла.  Болсада  аны хайырындан   къоранчланы бир кесегин жабаргъа онг табылады.  Субсидия бериуню жорукъларына кёре, страховка премияны эки тенгинден бирин  предприниматель кеси хуржунундан  тёлерге тюшерикди.

 Хасан Сижажев былтыр республикада 460 гектар чакълы сабанлыкъгъа   страховка этилгенин, анга   къыралдан  2,3 миллион сом берилгенин билдиргенди.  Быйыл да анга  4,4 миллион сом бёлюнюрюгюн, программагъа къатышырча, аны къайгъысын  иги да алгъадан этерлерин чертгенди.

Агрострахованиени  «РСХБ»,  «ВСК» эм «СК «Согласие» компанияланы республикада бёлюмлеринде   ётерге боллукъду.