Адам эм закон

Хыйлачылагъа энтта ийнаннгандыла

Быйыл 12 июньда Терк районну Дейское элинден 54-жыллыкъ тиширыуну телефонуна ол танымагъан биреулен сёлешип, банкны ишчисиме деп, аны 500 минг сом кредит алыргъа заявкасы къабыл кёрюлгенди дегенди. Тиширыу, кредит алыр умуту болмагъанына да къарамай, сёлешген бла ушакъгъа киришип, банк картасыны шартларын белгили этгенди. Алай бла андан 7,5 минг сом алыннганды.  

 44-жыллыкъ  нальчикчи тиширыу а интернетде кийимле сатханыны юсюнден билдириу басмалагъанды. Аны телефонуна белгисиз адам аланы алыргъа сюйгенини юсюнден жазып, ол сылтау бла картасыны шартларын билгенди. Тиширыуну да счётундан да 7,1 минг сому тас болгъанды.

Бу ишле бла байламлы уголовный тинтиуле башланнгандыла.

48-жыллыкъ нальчикчи уа социал сетьледе кредит  алыргъа себеплик этген  инсанны тапханды. Анга жазып,  болушханы ючюн ахча тёлегенди. Алай ахча къолгъа тюшгенлей, аккаунтну иеси, аны жабып, кеси да тас болуп къалгъанды.

Тиширыуну тарыгъыуу бла право низамны сакълаучула оператив-излеу жумушла бардырып, хыйлачылыкъ этгенине ишеклини тутхандыла. Ол Урожайное элден  алгъын да башы сюдлюк болгъан 33-жыллыкъ эр кишиди.

Право низамны сакълаучула банкланы ишчилери картаны тарихлерин сурамагъанларын энтта бир кере эсгертедиле. Картаны номерин, пин эм   CVV тарихлерин бир адамгъа да белгили этмегиз.

Ууну юйлеринде асырагъандыла

Право низамны сакълаучула 0,68 грамм метилэфедрон эмда 665,3 грамм марихуана наркотиклени сыйыргъандыла.

Быйыл 11 июньда полициячыла Нальчикде Кадыров эм Мусукаев атлы орамла бирге къошулгъан жерде «Чери» машинаны тохтатхандыла. Аны тинтгенде, акъ тюрсюнлю порошогу бла чулгъам табылгъанды. Аны 36-жыллыкъ водители айтханыча, ол наркотикди, ол аны кесине алгъанды. Экспертиза кёргюзтгенича, чулгъамда метилэфедрон уу асыралгъанды, аны ауурлугъу 0,68 граммагъа жетеди.

 Бу шартла бла байламлы РФ-ни УК-сыны 228-чи статьясыны 1-чи кесегине кёре терслеу материалла ачылгъандыла. Эр киши наркотиклени законлагъа бузукълукъла этип сатып алгъаны, асырагъаны, жюрютгени ючюн терсленеди.

Экинчи кюн а жолда жюрюуню къоркъуусузлугъу жаны бла инспекторла «Кавказ» федерал жолда «Хонда» скутерни тохтатхандыла. Транспортну тинтгенде, полициячыла шинтикни тюбюнде артмакъда белгили ийиси бла кырдык тапхандыла. Экспертиза ол марихуана болгъанын,  аны ауурлугъу 219,6 граммгъа жетгенин ачыкълагъанды. Скутерни Урвандан 39-жыллыкъ водителине РФ-ни УК-сыны 228-чи статьясыны 2-чи кесегине кёре терслеу материалла ачылгъандыла. Ол наркотиклени законсуз сатып алгъаны, асырагъаны, жюрютгени, хазырлагъаны, жарашдыргъаны ючюн тесленеди.

Дагъыда бу эки кюнде полициячыла 55-жыллыкъ нальчикчини, Александровская станицадан 39-жыллыкъ тиширыуну, 26-жыллыкъ дагъыстанчыны, 53-жыллыкъ къашхатаучуну, 40-жыллыкъ дейскечини эм 46-жыллыкъ нартанчыны юйлеринде тинтиуле бардырып, марихуана наркотик тапхандыла. Битеу да бирге сыйырылгъан ууну ауурлугъу  665,3 граммгъа жетеди. Бу шартла бла байламлы уголовный ишле ачылгъандыла.

Аты белгили этилгенди

Быйыл 11 июньда 15 сагъатда Нальчик черекде Идаров атлы орамда кёпюрню тюбюнде эр кишини ёлюгю табылгъанды. Тийишли жумушла бардырылып, аны аты белгили этилгенди. Ол 1982 жыда туугъан нальчикчиди. Сюд-медицина тинтиуле бардырылып, аны ёлгенини сылтаулары ачыкъланадыла.

РФ-ни Следствие комитетини КъМР-де следствие  управлениясы ишни болумун сюзеди.

Окъланы юйюнде асырагъанды

Чегем районну полициячылары энчи буйрукъла толтургъан  «Гром» отрядны келечилери бла бирге Чегем районда юйледен биринде тинтиуле бардыргъанда окълагъа ушаш затла тапхандыла. Юйню 61-жыллыкъ иеси ала къайдан чыкъгъанларын айталмагъанды. Экспертиза табылгъан окъладан алтысы 7,62 миллиметр, эллиси уа 9 миллиметр калибрли  керохха жарагъанларын ачыкълагъанды.

Мекямны иесине РФ-ни УК-сыны 222-чи статьясыны 1-чи кесегине кёре материалла ачылгъандыла. Ол законлагъа бузукълукъла этип сауутланы сатып алгъаны, асырагъаны, жюрютгени ючюн терсленеди.

Жюзсомлукъ ичгини багъасы – тутмакъ

Нальчикде УМВД-ны дежурный бёлюмюне бир тиширыу тарыкъгъанды. Аны айтханына кёре, Гагарин атлы орамда тюкеннге жаш адам кирип, бичакъ бла къоркъутуп, энергетик ичгини алып кетгенди. Участка уполономоченныйле, тийишли излеу жумушла бардырып, ишеклини тутхандыла. Ол алгъын да жууапха тартылгъан 20-жыллыкъ аргуданчыды.

Жаш адамгъа РФ-ни УК-сыны 162-чи статьясыны 2-чи кесегине кёре материалла ачылгъандыла. Ол сауутну неда анга ушаш затны хайырланып тонау этгени ючюн терсленеди. Аны эркинлиги он жылгъа дери сыйырылыргъа эмда миллион сом тазир салыныргъа боллукъду.