Кёп жумушланы тамамлагъа арала адамланы заманларын, кючлерин да аяйдыла

Къабарты-Малкъарны Кёп функциялы арасында (МФЦ) къырал эм муниципал жумушла жалчытылынадыла. Аланы юслеринден толуракъ билир ючюн биз аны Чегем шахарда бёлюмюнде адамла бла ишлеуде баш специалисти Чочайланы Марианна бла ушакъ этгенбиз.

- Биринчиден, сизге къаллай жумушла бла барыргъа боллугъуну юсюнден толуракъ айтсагъыз эди.

- Биз миграция, кадастр эмда приватизация бла байламлы ишлени, паспортну алышындырыу, Россей эм тыш къыраллы паспортланы бериу, тюрлю-тюрлю справкаланы жарашдырыу, регистрация, выпискаланы хазырлау эм аллай кёп тюрлю затны тамамлайбыз. Аланы толу тизмелери бизни сайтыбызда (мфц кбр.рф) берилипди.

- Сёз ючюн, мен сизге бир тюрлю иш бла кирдим, андан ары уа…

- Тюз да босагъадан ётгенлей, специалистлерибизге тюбериксиз. Алагъа ишни болушун ангылатасыз, документлеригизни бересиз. Къагъытла барысы да жетише эселе, ала сизни энчи ол не да бу жумушла бла кюрешген адамыбызгъа элтедиле. Андан ары ишигизни ол бардырлыкъды. Болжалгъа кёре, хар не да хазыр болгъанлай а, сизни телефон бла сёлешип чакъырлыкъдыла. Былайда белгилерге керекди – бизде битеу ишле хакъсыз этиледиле, ахча жаланда къырал пошлина ючюн тёленеди.    

- Марианна, сизге уа къаллай документлени жыйып барыргъа тийишлиди?

- Къаллай жумуш бла келгенигизге кёре, аланы да башха-башха къауумлары изленедиле. Сёз ючюн, юйюрюгюзню юсюнден справка керек эсе, паспортла, сабийлени (бар эселе) туугъанларыны юсюнден эмда ЗАГС-дан юйюр къурагъаныгъызны юсюнден шагъатлыкъ къагъытланы берликсиз. Урунуу стажыгъыз болмагъаныны неда бир жерде ишелемегенигизни юсюнден справка ючюн а жангыз паспорт да жетерикди. Къайсы справкагъа къаллай документле керек болгъанланыны юсюнден информация да сайтыбызда салыныпды.

- Адамла уа асламысында бери къаллай соруула бла келедиле?

- Кёбюсюнде аланы ишлери кадастр эсепге салыу эмда юйлени бла жерлени приватизациялау бла байламлыдыла. Алгъаракълада уа бизге аналыкъ капиталдан бир кереге этилген тёлеуню (20 минг) алырча  заявленияла хазырларгъа эркинлик да берилгенди. Аны ючюн да келгенле аз тюйюлдюле.

- Мен ангылагъандан, сиз адамланы узун коридорлада кеслерини кезиулерин сакълагъандан, бир къуллукъчудан бирсине тохтаусуз барыудан, заманны айланыулагъа къоратыудан «сакълайсыз»?

- Сёзсюз. Араны къурауну баш муратларындан бири инсанны ма быллай жюрюуледен эркин этиу эди. Хау, ала аслам келселе, аз заманны кезиулерин сакъларгъа бизде да тюшюучюдю. Алай ол сакълау узуннга созулмазча битеу мадарла этиледиле. Биз «бир терезени жоругъу» бла ишлейбиз, башхача айтханда, инсан битеу жумушларын да бир жерде толтурады.

- Алгъа МФЦ жангыз да Нальчикде ишлей эди. Аны бёлюмлери башха жерледе да ачылгъаны халкъ бери аслам келгенин кёргюзте болур?

- Хау, адамла мында не заманда да кёпдюле. Элчиле жумушлары бла къуруда шахаргъа барып къыйналып турмазча филиалла хар районда да бардыла. Чегемде бёлюм быйыл февральны аллында ачылгъанды. Ол угъай, бир-бир элледе окъуна специалистлерибиз ишлейдиле. Хар бёлюмде курьер турады. Ол биз жарашдыргъан документлени керекли органлагъа, службалагъа бла ведомстволагъа тапдырады, ала кеслерини жанындан ишлерин этгенден сора артха келтиреди. Болсада, биз, кеч къалмай, белгиленнген заманнга адамны ишин толусунлай толтурабыз.