Бир юйде бир бирге ушамагъан къадарлаКъыйынмыды насыпха жол огъесе ол къадарны саугъасымыды? Юйюр жашаугъа хазырланыргъа керекмиди? Бийик билимсиз шёндюгю дунияда адам башын кечиндираллыкъмыды? Бу соруулагъа шарт жууапла жокъдула, алай юйюрлени къалай жашагъанларына къарасанг, кёп зат ачыкъланады. Къайын ананы ауазы …«Бизде келинле кюндюз къалкъымаучудула, къыйналсанг да, тёзерге кюреш», - деди Майрусхан къарны бурунуна жете тургъан келинине. Жатып тургъан тапчанындан аны тылы ийлегенине къарап, сагъышланады. «Бир айдан къутуллукъ болур. Билдирмезге кюрешеди ансы, къыйналып турады. Тёзсюн, шёндюден эркинлик берсем, башыма минип къаллыкъды. Хали аман тюйюлдю, кирсизди, алай тынгылауукъду.Тынгылауукъну уа ичинде не болгъанын къайдан билгин? Мен, тели, аны бир жанындан тюшген файдасы иш хакъындан эсе кёп болгъанын къайдан биллик эдим. Иш айлыкъларын манга берип, экиси да аны бла къутуладыла. Энди келинни бир жанындан тюшген ахчасына уа не айтып оноу этейим? Оноу а керекди! Мени сёзюме сыйынып жашасынла!Кертисин айтсам, ол келгенли юйюм берекетли болгъанды. Жугъ а айтырыкъ тюйюлме, сюймейме ариу айтыргъа, махтаргъа, ёхтемленип тохтарыкъды. Кесин манга тенг сунуп юйде…биз тенг тюйюлбюз, менме тамата, ол а келин жерин билип, тынч турсун. Гюняхын да ала болурма жарлы жаныма. Мени къызыма да къара, анга да къара. Ма къоюлуп келип, сабийин да къоюнуна къысып жукълайды. Окъургъа да унамай, эрге къачып, энди уа мени сыртыма жюк болуп тюшгенди. Келинни анасы уа эки сёлешсе, къызымы окъутхан этгенме, къуллукъчу болуп ишлейди, деп махтанады. Охо, сабий бир тапсын да, аны къоз къабугъуна кийирирме. Сабийиме къарарыкъды деп бир да ышанмасын. Аллахны хакъына, табада гыржыны кюе турса да, сютю къайнап тёгюлсе да, тылысы ачый турса да, къарамам. Бешикге къолуму да салмам. Эрге бара билген, юй тута да билсин. Бизге уа ким болушханды? Жашым иги жашды. Къарынчыгъын аурутурукъ тюйюлдю. Окъууу болмагъанлыкъгъа, тютюн, аракъы ичгени жокъ. Ары элт, бери келтир десем,угъай демейди. Ол да ёсдюрсюнчю аллай жаш. Ма мени Салимамы эри ичгичи эди, ичи кюерик. Къайын анасы да эринчексе деп, къанын ичип турду харип сабийими. Тынчайсын энди ата юйюнде. Мен болушмасам, ким болушурукъду. Сёз нёгерлик да этеди». Жангы юйюрге – жангы жолла Майрусханны бу сагъышларын жукъудан тоюп отоудан эсней чыкъгъан къызы Салиманы тауушу бёлдю. Ол къалам болуп тургъан хычинледен бирини къыйырын юзюп къапды да: «Келин, былагъа бишлакъны асламыракъ къошсанг эди уа, къуру картошду ичлери», - деди. - Бишлакъны болгъанын къошханма, ол а аз эди, - деп жууаплады келинчик. - Къалай аз эди? Не болду да ол къадар бишлакъ? - деп секирип къопду Майрусхан. Салима эрнин къапды. Не этерик эди, аны эрттенликде саудюгерчи тиширыугъа сатханын айтды. - Да санга мени юйюмде оноу эт деп ким тилеген эди, эр юйюнгде оноу этсенг эди уа? - Памперслеге ахча керек эди. - Оу, мени жаууму да юйюнде къоюлгъан къызы болсун. Ол сабийинг да нек жиляйды, аны тойдуруп, алай ашасанг а. Башым да ауруду. Сени сабийинге, келин къутулуп, аныкъы да къошулса, ох этдирликсиз къартлыгъымда жарлы жанымы. Ол заманда келинчик, сёзге къошулуп: - Анабыз, жарсыма, биз шахаргъа кетерикбиз, - деди. - Не зат дединг? - деп, ёрге окъуна секирди Майрусхан. - Ол оноуну сизге анангмы этгенди? Хоу, анга деп ёсдюргенме жашымы.Ол шахарда къубулуп тургъанлыкъгъа, мен къара жерде тырнакълап, тахталада ишлеп алай ёсдюргенме сабийлерими. Къуллукъда ишлейме деп, сен, ананг бла бир тилли болуп, мени жашыма оноу этерча ким болгъанса?Энди чыгъарлыкъ кёреме сен ишлени. Алайлай жашы арбазгъа кирип келеди. - Анам, не къычырыкъды бу, жолда ётгенлеге эшитиледи хар сёзюнг, кюлюп барадыла. Сизге не болгъанды биягъы? - деп, тиширыулагъа къарады. Майрусхан олсагъат тюрленди. - Къорунг болайым, балам, олтур, ауузлан. Келинчик, жаным, къошчу бери исси хычинледен.Сууукъ айран да келтирчи. Салимагъа къычыра турама, балам, ол сабийге къара деп, гыз-гыз этип, тынчаймай турады. Тиш чыгъармай эсе. - Охо да, анам, алай да болады, андан башха сылтауугъуз жокъ эсе. Айран къуйчу, деп, жаш юй бийчесине гоппанны узатды. Сора: «Элтирик хапчукланы жыйышдыра тур, бюгюн кёчмесек, ишден берген фатарны башхалагъа берип къоярыкъдыла», - деди. Анасына айланып: «Барыбызгъа да алай иги боллукъду, анам, сизге тарлыкъ этип турабыз.Къасболат юйде эсе, жюк машинасын бир тилейим», - деп, арбаздан чыгъып кетди. Майрусхан а, келинине огъурсуз къарай, айтырыгъын артха салмады: «Да сен этерни этдинг, жашымы юйюмден суууруп элтесе, - деди, ал ботасы бла жилямукъланы сыйпай. - Къаллай юй болгъанынгы кёрейик. Бек иги жашымы береме санга».
Поделиться:
Читать также:
17.04.2024 - 15:20 →
Жерге таплыкъ бла къарагъан файдасын кёрюр
17.04.2024 - 14:40 →
Аны уа бир тутсам эди!
17.04.2024 - 14:38 →
Эм иги башламчылыкълагъа - себеплик
17.04.2024 - 10:00 →
Халкъ оюн – санны, тинни да къууанчы
17.04.2024 - 09:30 →
Аланы заманны желлери бюгалмагъандыла
|