Адам эм закон

Льготалы кредит

Быйыл 1 июльдан башлап «Биринчи/юйюр автомобиль» деген кредит берилип башлайды. Аны багъасы 1,5 миллион сомгъа  дери жетген машинагъа къоратыргъа боллукъду (алгъын ол багъасы миллион содан учуз машиналагъа берилгенди). Льготалы кредит бла жаш юйюрле, биринчи машина сатып алгъанла хайырланаллыкъдыла.  Ол алгъын эки эм андан кёп сабийлери болгъан юйюрлеге берилген эсе, энди аны бир баланы ёсдюрген юйюрле, дагъыда къырал больницалада, поликлиникалада ишлеген медикле да алыргъа эркиндиле.

Алай кредит жаланда россейли заводлада чыгъарылгъан машиналагъа бериледи.  

Жууаплылыкъ къатыланнганды

Быйыл апрельле кючюне кирген жангычылыкълагъа тийишлиликде, водитель жолда жюрюуню жорукъларына бузукълукъ этген кезиуде  машинада сабий болса,  жууаплылыкъ къатыланады. Ол жаны бла тюзетиуле РФ-ни Административ бузукълукъланы кодексине кийирилгендиле.

Дагъыда автобус  чыгъарылгъанлы он жылдан озса, аны сабийлени жюрютюуде  хайырланыргъа жарарыкъ тюйюлдю. Бу излемни кийириуню болжалы РФ-ни Транспорт министерствосуну тилеги бла бир ненча кере созулгъанды. Болсада РФ-ни Правительствосуну бегими бла битеу регионлада да бу излем  быйыл 30 июньда ишлеп башларыкъды.