Законсуз ырысхыны багъасы 4,6 миллион сомгъа жетгенди

КъМР-де МВД-ны Экономика къоркъуусузлукъ эм коррупциягъа къажау управлениясыны къуллукъчулары Май районда ОМВД-ны  полициячылары бла бирге оператив-излеу жумушла толтуруп, 39-жыллыкъ тиширыу къырал белгилери болмагъан тютюнле сатханын ачыкълагъандыла.

Аны юйюн эмда Майский шахарда базарда орналгъан тюкенин бла складын тинтген кезиуде тюрлю-тюрлю тютюн фирмаланы 25 минг пачкасын тапханды. Аланы акциз маркалары жокъ эди. Товарны битеулю багъасы 4,6 миллион сомдан артыкъды.

Тиширыугъа РФ-ни УК-сыны 171.1-чи статьясыны 6-чы кесегине кёре терслеу материалла ачылгъандыла. Ол къырал маркасы болмагъан товарны бла продукцияны хазырлагъаны, сатып алгъаны, асырагъаны эм сатханы ючюн терсленеди. Быллай аманлыкъ этгенни эркинлиги 6 жылгъа дери сыйырылыргъа боллукъду.

Тикаланы Фатима хазырлагъанды.
Поделиться: