Интернатчылагъа саугъала, жюрек жылыулукъ

ФСИН-ни КъМР-де Управлениясыны келечилери алгъаракъда Нартанда школ-интернатда жандауурлукъ акция бардыргъандыла, деп билдиргендиле ведомствону пресс-службасындан.

Къонакъла сабийлеге къуру къоллары бла келмегендиле; илляула, оюнла, татлы ашарыкъла, кёгетле да гитчелени бек къууандыргъандыла. Ала  дагъыда интернатчылагъа тутмакълада тургъанладан да саугъала бергендиле: къол бла этилген тюрлю-тюрлю затла, сувенирле да. Управленияда айтханларыча, ол адамла жюрек жылыуларын да аямай кёл салып жарашдыргъандыла аланы. Баям, жашау болумлары башхаракъ болгъанда, аны бла кеслерини сабийлерин да къууандырыргъа боллукъ эдиле…

Бу школ-интернатда ата-анасыз къалгъан сабийле кечинедиле. Учрежденияны башчылары къонакълагъа анда къаллай амалла хайырланнганларын хапарлагъандыла, сабийлени сейирлерини, спортда жетишимлерини, хунерликлерини юсюнден да айтхандыла. Ызы бла бирге окъуу кабинетлеге, ашханагъа, башха отоулагъа да къарагъандыла.

Тюбешиуню ахырында школну администрациясы УФСИН-ни келечилерине саулай коллективни атындан ыразылыкъларын билдиргендиле. Хар кере да къуру къоллары бла келмегенлерин, сабийлеге кёл салып байрам къураргъа кюрешиучюлерин да белгилегендиле.