Онлайн курслагъа сурам уллуду

Шёндюгю пандемияны кезиуюнде Къабарты-Малкъарда гражданланы бир талай  категорияларына «Россей Федерацияны цифралы экономикасы» миллет проектни чеклеринде къуралгъан «Цифралы экономикагъа кадрла» деген федерал проект бла белгиленнген жумушла тамамланадыла. Ол санда озгъан айда онлайн халда бардырылгъан «XXI ёмюрде интеллект иелик: жангы излемле, жангы амалла» деген билим бериу программаны да белгилерге тийишлиди, деп билдиргендиле Къабарты-Малкъар къырал университетден.

Бу программагъа Шимал Кавказны бар регионларындан тогъуз жюзден артыкъ адам къатышханды. Ол санда КъМР-ни властьларыны эмда КъМКъУ-ну болушлугъуну хайырындан, бизни республикадан – 460 чакълысы.

Университетни ректору Юрий Альтудов айтханнга кёре, бу программаны  къурау эм жашауда бардырыу, НТИ 20.35 университетни (Москва), Волгоградны техника университетини проект жумушланы тындыргъан POLYGON арасыны эмда «Ишчи альянс» компанияны (Санкт-Петербург) келечилерини бирлешип къармашыуларыны хайырындан болгъанды.

НТИ проектлеге эмда жамауат ишлеге себеплик этиу Департаментни («Точка кипения» КъМКъУ) келечилери, вузну башха бёлюмлерини специалистлери бла бирге, къырал къуллукъчуланы, школ устазланы, вузланы преподавательлерин, жамауат организацияланы башчыларын эмда быллай темалагъа сейирлери болгъан гражданланы бу программагъа къатышыргъа чакъыргъандыла. Аны эксперт, адвокат, юридический илмуланы кандидаты, доцент, Россей Федерацияны эмда Евразияны патент поверенныйи Виталий Кастальский бардыргъанды. Ол интеллект иеликни къоруулауну эм хайырланыуну юсюнден хапарлагъанды, Россейде эмда тыш къыраллада тийишли сынам бла да шагъырейлендиргенди.

Билим бериу курс видеолекцияладан, презентацияладан, тестледен къуралгъанды. Анга къатышханла ахырында квалификацияларын кючлендиргенлерини юсюнден удостоверенияла алгъандыла.

Дагъыда университетни келечилери хорлагъан (9 миллион сомдан артыкъ) грантны хайыры бла «Хар кимге да жангы амалла» деген федерал проектни чеклеринде талай иш тамамланнганды. Республиканы бир-бир районларында эм шахарларында «Саулукълу жашау этиу», «Къыйын болумланы медицинасы», «Амалсыз халлада госпитальгъа дери медицина болушлукъ бериу» программала бла 3,7 мингден артыкъ адам (план бла 2010 болургъа керек эди) билим алгъандыла. Саулай айтханда, тийишли курслагъа 327 учрежденияны келечилери къатышхандыла.

Университетни тауусханла алгъан билимни жангыртхан, тийишдирген курслагъа сурам уллу болгъанын «XXI ёмюрде интеллект иелик: жангы излемле, жангы амалла» деген билим бериу программагъа кёп адам къатышханы кёргюзтгенди. КъМКъУ-да аны эсге алып, мындан арысында да онлайн халда кёп тюрлю курсла бардыра турургъа таукел болгъанларын белгилегендиле.