Банкдан – сабий больницагъа жангы оборудование

   ВТБ "Жилямукъсуз дуния"  жандауурлукъ программагъа кёре, Республикалы сабий клиника больницаны хирургия бёлюмюне 1 500 000 сом  тургъан диагностика оборудование алып бергенди.
  Ол багъыу учреждениягъа келтирилген кюн а керти да байрамгъа айланнган эди. Банкны ишчилери, саусуз балачыкъланы къууандырыр ючюн, "Тынч  кечели болугъуз, сабийчикле!" деген телевизор бериуню жигитлерин - Каркушаны, Хрюшаны, Степашканы - чакъыргъан эдиле. Композитор Владимир Щукин а, жырлап, тепсеп да, бир ауукъ заманны сабийлени эслерин кесине буруп тургъанды. Ахырында уа хар жашчыкъгъа бла къызчыкъгъа саугъала юлешиннгендиле.
    Республикалы сабий клиника больницада жыл сайын онбеш минг чакълы саусузгъа багъадыла. Анда УЗИ аппарат жетишмей  кёпден бери къыйналып тургъандыла.  Экиси бар эди да,  бирде юч смен бла окъуна ишлерге тюшгенди. Аладан  бири 2011 жылда модернизация программагъа кёре алыннганды. Алай нейрохирургия, абдоминал, урология операцияланы  кезиуюнде аурутуп къыйнагъан  жерни тынгылы  кёргюзтмегенди. Аны себепли MindraeDC-N3 фирманы бусагъатдагъы излемлеге  кёре хазырланнган приборгъа хирургия бёлюмде ишлегенле бютюн  бек къуаннгандыла.
     - Аны техника амаллары уллудула: операцияны кезиуюнде бир жерден башхасына  кёчюрюрге боллукъду, сабийни ауругъан жерин, ол санда башында да, терен тинтирге онг береди,- дейди врач Ануар Молов, аппаратны къалай ишлегенин кёргюзте.
   Больницаны баш врачы Людмила Гусалова клиникада уруннганланы, аны администрациясыны да  атларындан  банкны оноучуларына жюрек ыразылыгъын  билдиргенди. Кеслерини ыспас  сёзлерин башха врачла да айтхандыла.
   ВТБ-ны вице-президенти Евгений Орлов а "Жилямукъсуз дуния" деген программаны юсюнден къысха билдириу этгенди. Анга кёре, онбеш жылны ичинде  къыралны эллиден артыкъ регионунда медицина учреждениялагъа болушлукъ этилгенин, сабий больницалагъа  оборудование эмда багъалы дарманла алыннганларын да айтханды.  Банкны Нальчикде  офисини директору Жираслан Бештоков да программагъа кёре былтыр да бу больницагъа керекли   оборудование берилгенин эсгертгенди.

Холаланы Марзият.
Поделиться: