Жарашдырыучу промышленность продукция кёбейгенди

Быйылгъы жыл башланнганлы Къабарты-Малкъарны жарашдырыучу производствосунда  6,5 миллиард сом багъасына иш этилгенди, деп билдиргендиле КъМР-ни Эл мюлк министерствосуну пресс-службасындан. Былтырны биринчи кварталы бла тенглешдиргенде, аш-азыкъ эм жарашдырыучу  промышленность продукция 20 процентге кёбейгенди.    

Шимал-Кавказстатны эсеплерине кёре, республикада озгъан  тёрт айгъа  аш-азыкъ эм жарашдырыучу промышленность жаны бла 6,5 миллиард сом багъасына продукция чыгъарылгъанды. Ол былтыр бу заман бла тенглешдиргенде, 17,6 процентге асламды. Аны бла бирге алты айгъа  татлы ашарыкъладан 3,7 минг тонна продукция чыгъарылгъанды. Ол да былтырдан эсе  15,5 процентге кёпдю.  

Сют  производствода да ахшы жетишимле бардыла. Быйыл былтыргъы бу замандан эсе  эки кереге кёп -  39,5 тонна - къаймакъ алыннганды. Кефирден бла йогуртдан эмда башхаларындан  9,2 минг тонна сатылгъанды. Ол да былтыр бу заман бла тенглешдиргенде, 5,2 процентге кёпдю. Сютню кесинден 7 минг тонна алыннганды.  Бу жаны бла да башха кезиуледен эсе  23 процентге  ёсюм эсленеди.  Саулай айтханда, бёлюмде производство 3,4 процентге кёбейгенди. Агропромышленный комплексни юсюнден айтханда да, 7,2 миллиард сом багъасына продукция чыгъарылгъанды.

Магометланы Сулейман.
Поделиться: