Кеф водительле бютюнда Нальчикде кёпдюле

  Бир ыйыкъны ичинде, 14-20 январьда, автоинспекторла эсирип жолгъа чыкъгъан 62 водительни ачыкълагъандыла. Аладан 17-си  бу аманлыкъны къайтарып этгендиле.   Кеф водительле бютюнда Нальчикде кёп болгъанлары тохташдырылгъанды, деп билдиргендиле бизге КъМР-де МВД-ны пресс-службасындан.  

   Жылны аллындан бери уа полициячыланы къолуна 163 эсирген водитель тюшгенди,   ол санда 32-чи бу аманлыкъны къайтарып этгендиле. Ала  РФ-ни Уголовный кодексини 264.1-чи статьясына тийишлиликде жууапха тартылыргъа боллукъдула.  
Автоинспекторла жолда жюрюуге къатышханланы   саулукъларына, жашауларына къоркъуу салгъан бузукълукъланы болдурмаугъа энчи магъана бередиле. Алай тазирле уллу болгъанларына, жууаплылыкъ къатыланнганына да къарамай, бир-бирле ичип  жолгъа чыгъаргъа угъай демейдиле. Ала кеслерини, тёгерекде адамланы саулукъларына къаллай къоркъуу салгъанларын ангыламайдыла.  Аллайланы арасында  21-жыллыкъ жаш адамла,   45-жыллыкъла да бардыла.     
Эсирип тутулгъан неда медицина тинтиуледен ётерге унамагъан водительге 30 минг сом тазир салыннганын эмда машинаны жютюрюрге эркинлик эки жылгъа сыйырылгъанын эсгертедилеКъабарты-Малкъарны право низамны сакълаучулары.  Быллай аманлыкъны къайтарып этген а  уголовный жууапха тартылады.