Право низамны, ырахатлыкъны чынтты жакъчысы эди

2005 жылда октябрьде Нальчикге чабыууллукъ этилгенли быйыл он жыл толады. Алай андан бери  бизни мамыр, айбат, къонакъбай республикабызда ол къужур иш нек болгъанды, аны сылтауу недеди деген соруулагъа жууапла алыкъа берилмегендиле.  Шёндю  право низамны сакълаучу органланы келечилерини ишлерини хайырындан  жамауат къоркъуусузлукъ тынчайгъанды дерчады.

Болсада жылны аллындан бери, жарсыугъа,  право низамны сакълаучулагъа чабыууллукъла этилгендиле. РФ-ни ич ишле министри Владимир Колокольцев бу кюнледе видеоконференцияны кезиуюнде хар жылдан да Шимал-Кавказ федерал округда орта эсеп бла 200 полициячы ёлтюрюлгенин айтхан эди.   

2010-2014  жыллада уа СКФО-да  кеслерини ишчи борчларын толтургъан кезиуде ич ишле органланы 576 келечиси ёлтюрюлгенди.  Бу статистикагъа Къабарты-Малкъар да кесини бушуулу «къошумчулугъун» этеди.

Тебердиланы Рамазанны жашы Ахмат да ол къара тизмедеди. Ол быйыл кесини 45-жыллыгъын белгилерге боллукъ эди, алай аны жашауу 2007 жылда бандитлени къолундан юзюлгенди.

Ахмат жашауун милиция бла байламлы этерге деп да тура болмаз эди. Ол Тырныауузну 5-чи номерли школун бошагъандан сора Владикавказда Север-Кавказ тау-металлургия  институтха киреди. Инженер-механика факультетни жетишимли бошап, Тырныауузда вольфрам-молибден комбинатха ишге киреди. Мында уа жашны тирилигин, иш кёллюлюгюн эслеп,  аны Элбрус районда ич ишле бёлюмде къуллукъ этерин тийишли кёредиле.

Жаш ич органлагъа тохташханы бла бирге Санкт-Петербурда милицияны школуна окъуугъа киреди. Оператив-тинтиу ишде жетишимлери ючюн а къысха заманны ичинде ол Элбрус районну уголовный розыскыны таматасына салынады.

Милицияда къуллукъ этген биринчи кюнден окъуна да Ахмат билимли, тири, иш кёллю жаш болгъанын ачыкълайды. Ол, оператив халны терк сюзюп, кемчиликлени таба, аманлыкъчылагъа къажау ишни бийик даражада къурай билгенин  кёргюзтеди. Ол кеси эмда аны башчылыгъында милициячыла уллу эмда бек уллу аманлыкъ ишлени уллу къауумун тинтип, аланы  этгенлени ачыкълагъандыла.

Теберди улу, кюнюн-кечесин да къызгъанмай, районда аманлыкъчылыкъны жолун кесиуге, жамауатны къоркъуусузлугъун сакълаугъа толусунлай берилгенди.  Аны бузукъчулагъа быллай кюйсюзлюгюне бюсюремегенле аз тюйюл эдиле.

2007 жылда 23 июльда Ахмат кече юйюне къайтхан кезиуде анга чабыууллукъ этилгенди. Жаш машинасындан чыкъгъанлай, анга эки бандит автоматладан от ачхандыла. Алайда алгъан жаралары асыры ауурдан Тебердиланы Ахмат эки кюнден Тырныауузну больницасында ёлгенди.

Жашны къуллугъун толтургъан кезиуде жигитлиги ючюн  ёлгенден сора  Кишиликни орденине  тийишли кёрюлгенди.