Ахшы умутладан толгъан жашау

Черек муниципал районда Билим бериу эм жаш тёлю политика  управленияны инспектору Керменланы Рита юч сабийни анасыды. Къыйынмыды анга жууаплы ишни толтургъан? Ол, артыкъ сёз айтмай, кёп ишлей биледи. Баям, анга сейир этерча тюйюлдю: ата-бабаладан бери таулу тиширыула солуу кюнсюз ишлеп жашаргъа юйреннгендиле.

Рита Къашхатауда туугъанды. Химия факультетни бошагъандан сора усталыгъына кёре  ишлеп да тургъанды. Къадары алай болур эди, таулу тойда Огъары Малкъардан Къазакъланы Алий бла танышады. Бир ауукъ заманны жаш адамла тюбеше кетип, юйюр къураргъа оноу этдиле. Къыз  элни къыйын жашау халындан къоркъмагъанды. Ачыкъ айтханда, бизни шахарларыбыз бусагъатда элледен  артыкъ бек айырмалы тюйюлдюле. Рита да элни бек сюеди.Жашагъан Огъары Малкъарда этгенликге,  кюн сайын ишге Къашхатаугъа, Алий а Нальчикге жюрюйдюле.  Алиханны  бла Амирханны аппалары Рустим аланы элде сабий садха элтеди. Аминачыкъны уа анасыны ишини къатында яслиге жюрютедиле. Ингирликде  уа барысы да  бирге жыйышадыла.

Алгъаракъда уа ала  Нальчикде кёп къатлы юйде фатар сатып алгъандыла, алай кёчерге ашыкъмайдыла: аппа-ынна бла уллу юйюрде жашаргъа сюедиле. Къазакъланы учхунда бир бирге билеклик этген тёреди. Юйюр тамата, башында  сагъыннганыбызча, туудукъларына кёп заманын бёледи. Юйдегиси Мариям элде экинчи номерли школда юйретиу жаны бла директорну орунбасарыды. Насыплы амма сабийлеге профессионал кёзден къарайды.

Рита айтханнга кёре, юйюр жашау бла профессионал иш бир-бирге чырмаулукъ этмейдиле. Жаш тиширыуну жангы затха юйренирге итиниулюгю уллуду. Сабий бла юйде тургъан кезиуюнде заманын зырафына оздурмагъанды. Къол ишге устады, ыргъакълы ийне бла эшерге юйренип, хунеринден хайыр кёргенди.  

Субай санлы, жаш ананы ич дуниясы байды. «Бек башы - жашаугъа къарамынг ахшы умутладан толу болургъа керекди», - дейди ол. Билим бериу эм жаш тёлюню ишлери жаны бла управленияда буюрулгъан жумушланы айыпсыз тындырыргъа  аны таматасы Тареза Эфендиева бла алчы специалист Герийланы Мадина дайым билеклик этедиле. Ол угъай, Ританы анасы да - Керменланы Кулизар - къызы ишлеген жерде эрттеден бери уруннганы себепли, бай иш сынамын къызгъанмайды, насийхатчылыкъ этеди.

-Анам районну школларында математикадан, информатикадан эм физикадан  устазла дерслерин къалай хазырлагъанларын бла бардыргъанларын тинтеди. Мен а ана тилден окъутханла бла мектепледе библиотекаланы ишлерин къурагъанла кеслерине буюрулгъан жумушланы къалай тамамлагъанларын сюземе.

Устазла бу дерслеге тынгылы хазырланадыла, сабийлени ёз тиллерине дайым итиниулюклерин ёсдюредиле. Арт жыллада дерсликле жангыртылгъандыла, алагъа кёп тюрлениуле кийирилгендиле. Школ библиотекалада китапла асламдыла. Озгъан окъуу жылны дерсликлерин келир жылгъа алышыр онг барды, - деп, чертеди жаш специалист. «Школгъа – китап саугъа» деген чакъырыу да саулай республикада ахшы тёреге айланнганды, бизни районда ол алжаусуз ишлегенлей турады. Сагъынылгъан программаны хайыры бла уа библиотекаланы айныуларына уллу себеплик этилгенди,  дунияда айтхылыкъ жазыучуланы да иги кесек чыгъармалары къошулгъанды.   

Жангы жерни  «жырын» жырлап, юйюр къурагъан тынч тюйюлдю. Ританы ол жаны бла насыбы тутханды. Кеси устазланы юйюрюнде ёсген къыз Огъары Малкъарда белгили педагог учхуннга тюшгенди. Къазакъланы Сафият элде биринчи устазладан бири болгъанды. Сегизжыллыкъ школну къурап, директорлукъ этгенди. Чалбаш болгъанда да сабийлени окъутханлай тургъанды.

Мектеп таба революционер Къазакъланы Жюнюс атлы орам бла озуп барса окъуна, оюннга къызгъан сабийле дауурларын тохтатып, анга намыс бергендиле. Рустимни къарындашы  Къазакъланы Борис, элни ветеранларыны советини башчысы эди, кёп жылланы школгъа таматалыкъ этип тургъанды, жаннетли болсун,аны ауушханы битеу элге да уллу бушуу болгъанды.  

Рита сабийни окъутууда-юйретиуде аппаланы-ынналаны, битеу да тамата тёлюню магъаналарын энчи чертеди. Ала намысха, адет-тёреге, тёзюмлюкге тюшюндюредиле – ала  уа жашауда бек керекли сезимледиле. Сабийлигинден  юйреннген къылыкъ  инсанны абаданлыгъында да сакъланады.