Жангы социал объектлеге – токну кереклиси тенгли бир

Быйыл биринчи кварталда «Россети Шимал Кавказ» компаниягъа ток сетьлеге къошулургъа сюйгенледен 6690 заявка берилгенди. Аланы барына да 302 МВт электрокюч жиберирге керекди. Тенглешдирип айтханда, былтыр бу кезиуде заявкаланы саны жаланда 4800 болгъанды, деп белгилегендиле компанияны КъМР-де бёлюмюнде.

Аслам сурам Дагъыстандан этиледи. Андан 2600 заявка берилгенди. Чеченден – 1950, Ставрополь крайдан – 774, Къабарты-Малкъардан да – 361. Ток бла жалчытынырыкъланы арасында промышленность, эл мюлк, социал объектле, жашау журтла да бардыла. Энчи магъана медицина учреждениялагъа бериледи. Сёз ючюн, жылны башындан бери Грозныйде ара больница, Ставрополь крайда – тёрт эмда Шимал Осетияда - бир фельдшер-акушер пунктла эмда туберкулёзгъа къажау диспансер къошулгъандыла сетьлеге. 

Бахсан шахарда бир ясли, Атажукино элде маданият-солуу ара эмда Нартанда маданият юй да ток бла жалчытынып башланнгандыла.

Компанияда быллай заявкаланы электрон халда аладыла. Сейирлери болгъанлагъа деп  Портал ТП.рф сайт ишлейди. Анда бу жумушну жик-жиги бла тамамларгъа боллукъду.

Улбашланы Мурат.
Поделиться: