Зояны илхамы

Баям, хар инсанны да болур жюрегинде назмучулукъ. Жашауну ангылай тебиресе, ол аны сёз бла айтыргъа итинеди. Бирле аны ариу тизгинлеге тизип белгили этедиле. Аланы окъуй, авторланы жюреклеринде болгъан сезимле бла шагъырейленебиз. Алагъа кёре оюм этебиз. Бирде уа жашаугъа жангы кёзден окъуна къарайбыз. Алайсыз тёгерек сейир да болмаз эди.

Бир-бир сёз устала уа  назму, жыр такъсала да, ачыкъ этмей, кеслеринде тутадыла. Алай адамны сейирин къозгъарыкъ, жюрегинде ыз къоярыкъ тизгинле белгили болургъа керекдиле. Ала да культурабызгъа къошумчулукъдула.

 Аны айта келгеним, бардыла тау эллерибизде назму, жыр, хапар да жазгъанла. Атлары уа айтылмай тургъанла. Аладан бири Хушто-Сыртдан Гыжгыланы Юсюпню къызы Къуршаланы Зояды. Ол элде орта школну бошагъандан сора тюкенчи болуп къауум заман ишлегенди. Андан сора Къуршаланы Миммолат бла юйюр къурагъанды. Тёрт къыз бла эки жаш ёсдюргенди. Ала да окъуулу, билимли болгъандыла. Усталыкъларына кёре бирер жерде урунадыла. Зоя уа илхам келген кезиулеринде  жазады.

Туугъан Хушто-Сыртына атагъан назмусун окъусанг, ол элни тёгерегиндеги табийгъатны ариулугъу кёз аллынга келип къалады. «Къарлы къышда, ариу жазда акъ булутлагъа бёленип», - дейди автор. Нечик сейирлик суратды ол. Не уа «Жашау» дегенинде  ол былай айтады: «Заман женгил барады, Сен, мен оюм этгинчи жашау кетип къалады, Ахыр сагъат жетгинчи». Тюппе-тюз, керти сёзле. Энди уа газет окъуучуларыбызны Зояны бир къауум назмусу бла шагъырей этейик.

 

Османланы Хыйса.

 

 

Урушдан

къайтмагъанлагъа

Келлик тёлюле ючюн

Жаннган отха киргенле,

Жерлеринден узакъда

Жаш жанларын бергенле.

 

От жагъабызны оту

Ёчюлмезча этгенле,

Жесирлик азабындан

Азат этип, кетгенле.

 

Хорламны къууанчына

Жеталмайын къалгъанла,

Миллет жашар ючюннге,

Тенгизледе батханла.

 

Жашап турур атыгъыз

Ёмюрлени тёрюнде,

Унутулмай, айтыла

Хар инсанны кёлюнде.

 

Хушто-Сыртым – жаннет жерим

Къарлы къышда, ариу жазда

Акъ булутлагъа бёленип,

Жазама санга назмула,

Ариулугъунга кёлленип.

 

Чучхурларынг – сейир затла,

Ёхтемлиги тау элими.

Жарыкъ атхан тангларынг да

Кётюредиле кёлюмю.

 

Сууукъ шауданла – дарманла,

Къарыу бере санларынга.

Ингир шошлугъуна бата,

Хошлукъ саладыла жаннга.

 

Сюйген элим – жаннет жерим,

Ариу журтланы анасы.

Ёсюп келген жаш тёлюню

Оюлмазлыкъ, бек къаласы.

 

Ачыкъ кёллю эллилерим –

Жарыкъ болгъанла келгеннге.

Эски Чегем тарын кёрюп,

Сейирге къала келгенле.

 

Орналгъанса, ариу элим,

Чегем черекни боюнунда, 

Сюйюнюп эм эркеленип,

Бийик тауланы къоюнунда.  .

Жашау

Жашау бийик саугъады

Аны эте билгеннге,

Къууанч, бушуу кёрсе да,

Ариулугъун сезгеннге.

 

Шукур Уллу Аллахха –

Бизге насып сынатды,

Тёзюм берип палахда,

Керти насып танытды.

 

Заман женгил барады,

Сен, мен оюм этгинчи,

Жашау кетип къалады,

Ахыр сагъат жетгинчи.

Поделиться: