Таулу къызла байрамда

Бу суратны газетге беририбизни тилеп Хасанияда жашагъан Гуталаны Назифа жибергенди. Ол жазгъаннга кёре, сурат 1952 жылны биринчи майында,  байрам кюнде алыннганды. Кеси да аны эгечи Аттоланы Шамканы альбомунда сакъланнганды.

Суратха тюшген бызынгылы къызла, ол заманда Къыргъыз ССР-ни Исси-Кёл областыны Григорьевка элинде жашап, «Авангард» колхозда ишлегендиле. Бирлери алмала жыйгъандыла, башхалары шарх-шархны кесгендиле. Аланы барыны да жыл санлары жыйырмадан атламагъан эди. Къызла, иги ишлегенлеринден  сора да, миллет тепсеулени ариу тепсегендиле, адеплиликлери, намыслылыкълары бла да айырмалы болгъандыла. Алай бла таулула, кёчгюнчюлюкню ауур жюгюн да элте, къайгъыларын да чачаргъа кюрешгендиле. Миллетибизни къыйын кюнлеринде да адетлерин, тёрелерин къоймагъандыла.

Къызланы барыны да атлары белгилидиле. Жарсыугъа, аланы бир-бирлери ауушхандыла. Насыпха башхалары арабызда жашайдыла. Заман аланы чачларын агъартханды, ыннала болгъандыла, туудукъларын ёсдюредиле.

(Олтургъанла): Аттоланы Шамка, Рахайланы Ханипа, Гайыланы Окъа, Толгъурланы Булюха, Аттоланы Ыпый; (сюлгенле) Толгъурланы Няннёка, Аттоланы Зайнаф, Чочайланы Маржан, Чочайланы Запура, Чеккаланы Гитчекъыз.

Суратда: таулу къызла май байрамдан сора.