Низамны бузгъаны ючюн административ жууапха тартылгъанды

Коронавирус жукъгъан ауруу жагъылгъанына ишекликде юйюнде турургъа борчлу этилген жаш адам аны сакъламагъаны ючюн административ жууапха тартылгъанды. Аны машинасында бара тургъанын «Къоркъуусуз республика» система эсепге алгъанды.

КъМР-де МВД-дан бизге билдиргенлерича, республикада жукъгъан ауруугъа къажау мадарлагъа хазырлыкъны низамы кийирилгени бла санитар-эпидемиология къоркъуусузлукъ законла  къалай толтурулгъанларына контрольну тамамлау право низамны сакълаучуланы баш ишлеринден бири болгъанды. Кюн сайын  республиканы шахарларында бла эллеринде полицияны 700 аслам къуллукъчусу бла 100 аскерчи жамауат къоркъуусузлукъну жалчытадыла, орамлада низамлыкъгъа къарайдыла.

Республиканы халкъыны асламы власть органланы юйден тышына чыкъмазгъа деген оноуларын толтурадыла, орамлада адамла аздыла.  Алай ангылатыулагъа, тилеклеге, чакъырыулагъа  тынгыламагъанла, уллу тазирледен къоркъмагъанла, кеслерини, жууукъларыны  саулукъларын сансыз этгенле да бардыла.  Болсада халкъны саулугъуна къоркъуу салгъан инсанланы тохташдырыу эм ачыкълау система ишлейди. Коронавирус кенг жайылгъан регионладан келгенле, ауругъанлары тохташдырылгъанла бла тюбегенлери ючюн юйлеринден тышына чыкъмай турургъа борчлуланы атлары  право низамны сакълаучу органлагъа белгили этилгендиле.  Аланы машиналары да контрольдадыла.

Жорукъну бузгъан инсан а Нальчикде тутулгъанды. Ол машинасында республиканы ара шахарына кирген кезиуде «Къоркъуусуз республика» система эсепге  алгъанды. Беш минутдан а аны жолда жюрюуню къоркъуусузлугъу жаны бла инспекторлары тохтатхандыла.

Бахсанчы 30-жыллыкъ жаш 5 апрельде Москвадан келгенди. Бегимге тийишлиликде ол эки ыйыкъны юйюнден чыкъмазгъа керек эди. Ол, аурумай эсе да, санитар-эпидемиология къоркъуусузлукъ жаны бла законланы бузгъанды. Аны ючюн административ бегим жазылгъанды. Энди 14 кюнню ичинде бахсанчыны халына саулукъ сакълау учрежденияда къарарыкъдыла.