Къайда да жигерликни юлгюсюн кёргюзте

Уллу Хорламны – 75-жыллыгъына

Революциядан сора Совет власть тохташып аягъы юсюне болгъанда, къыралда байла-бийле бла кюрешиу башланнган эди. Инсан урушну кезиуюнде къырылмай сау къалгъан малкъар бийлеге да жетеди ол къыйынлыкъ. Аланы туугъан эллеринден къыстап, башха жерлеге кёчюредиле.

Аллайладан бир къаууму Дагъыстаннга – Буйнакскеге тюшедиле. Андагъы адамланы асламысы къумукълула эдиле. Тилибиз келишгенини хайырындан ала мындан баргъан адамларыбызгъа иги болгъандыла. Болсада Ата журтларындан къысталгъан бла бошалмайды аланы къыйынлыкълары, тынчлыкълары да къуругъан эди. Отуз жетинчи жыл эр кишилени тутадыла. Ала андан къайтмайдыла.

Тиширыула бютюнда амалсыз боладыла. Алай сабийлени ёсдюрюрге керек эди. Ишге чыгъадыла. Таулу къызла тигиуге уста эдиле. Асламысы Буйнакскеге Гаджиев атлы трикотаж артельге киредиле. Алгъа юс кийимле хазырлап турадыла. Урушну кезиуюнде уа – аскер форма эм уллу сауутланы жабаргъа брезент къапла бла солдатлагъа палаткала.

Ишчилени асламысы таулу тиширыула эдиле. Ала планларын 2-3 кереге кёп этгендиле. Артельни директору алагъа бек иги болгъанды. Къыркъ тёртюнчю жыл халкъ бла аланы да кёчюребиз дегенде, Москвагъа барып, къырал къуллукъчулагъа тюбеп: «Мен аскерге кийим тикдиреме, планны тамамлагъанла аладыла. Тиймегиз, ишлерге къоюгъуз», - деп тилегенди.

Болсада фашист Германия ууатылгъандан сора, 1945 жылда сентябрьде, Буйнакскеде жашагъан таулуланы Азиягъа жибередиле. Ала кёчер кюнлени аллында уа, артельде ишлегенле жыйылып, суратха тюшедиле. Суратда Абайланы, Мысакаланы, Айдаболланы, Шакъманланы, Кючюкланы, Бийкъанланы, Дадешкелианиледен, Сюйюнчланы, Келеметланы келечилери болгъандыла. Ким биледи, бу къызланы таныгъанла чыгъарла эселе уа.