«Къарачай-малкъар фразеология сёзлюкден»

(Баргъаны) 

Фразеология сёз тутушланы бизни ата-бабаларыбыз кёп сынауладан сора такъгъандыла. Алада бир къауум сёз бирге болуп, бир тюрлю бир тасха магъананы тутадыла. Аланы тюз хайырлана юйренейик. Жыйымдыкъны Жарашууланы Зайнаф жазып алгъанды, басмагъа Мусукаланы Сакинат хазырлагъанды. 

Ж

ЖАБАГЪЫЛЫ ЖАРЫ ТАЙ (фольк.) Гырхы, алай жюйрюк, жигер тай (ат).

ЖАБУ (жабы – диал.) БОЛУРГЪА (этерге) Гузабалы, къаугъалы болургъа (этерге).

ЖАГЪА АЛМАЙ, ЭТЕК БЕРМЕГЕН [адам] (Юй жашаудан.) Кесине оздуруучу, къызгъанч адам.

ЖАГЪАДАН-ЭТЕКДЕН БОЛУРГЪА (къарач.) Биреуню ортагъа алыргъа (урушургъа, тюйюшюрге д.а.к.).

ЖАГЪАСЫН АГЪАРТЫРГЪА Кирсиз кийиндирирге (эр кишини).

ЖАГЪАСЫН ЖЫРТДЫРЫРГЪА Айтханын, ишин къоруулар ючюн, къаты сюелирге.

ЖАГЪАСЫНА ЖАБЫШЫРГЪА Тюйюшюрге, тюерге хазырланыргъа.

ЖАГЪАСЫНА ЖАРАШХАН (ушагъан) [зат] Адамны намысына, даражасына тийишли [иш, сёз, зат].

ЖАГЪАСЫНА ТИЙИШЛИ (кёрюрге) Кесини адамлыгъына, намысына тийишли кёрюрге.

ЖАГЪАСЫНДАН АЛЫРГЪА Къадалыргъа, къаты болургъа.

ЖАЗ БЛА КЪЫШ АЙЫРЫЛГЪАН [заман] Март айда кече бла кюнню узунлугъу тенг болгъан заман (мартны 20–22-чи кюнлери).

ЖАЗ ТИЛ Кёчюрюлген магъанада, башы жабылып айтылгъан сёз.

ЖАЗГЪА ЧЫГЪАРЫКЪДЫ (масхара) (Юй жашаудан.) Семизди, сен суннганча, аман тюйюлдю, къарыулуду деген магъанада.

ЖАЗГЪЫ КЮН КИБИК [адам] Халы терк тюрлениучю, жагъынлы адамны юсюнден.

ЖАЗДЫРМАЙ АТАРГЪА [ушкокну] Уста мараргъа.

ЖАЗМАЙ АТЫЛГЪАН [окъ] Тюз да марагъанына тийген окъ.

ЖАЗЫУ ЖАЗЫЛЫРГЪА (дин) Къыз бла жашха некях этерге (бир юйюр болургъа).

ЖАЗЫУЛАРЫ БИР БОЛУРГЪА (дин) Экеуленни жашауу бирге болургъа.

ЖАЗЫУУ АЛАЙ БОЛУРГЪА (дин) Биреуню иши, жашауу Аллах буюргъанлай болургъа.

ЖАЗЫУУНА ТЮБЕРГЕ (жолугъургъа) (дин) Аллах буюргъан къадаргъа тюберге.

ЖАЙ ЧИЛЛЕ Жайны бек къызыу кезиуюнде 40 кюн (17 июльдан 25 августха дери).

ЖАЙРАКЪ МИНЕРГЕ Иери, жюгени болмагъан атха (эшекге) минерге.

ЖАКУ КЪАЛЖАСЫ БОЛУРГЪА (этерге) (Юй жашаудан.) Хар зат къатышыргъа, тизгин бузулургъа (сынып, ууатылып, чачылып д.а.к.).

ЖАКЪ БАСАРГЪА Биреу жанлы болургъа, аны къорууларгъа. (жалыннгандан) ЖАЛ БАУУРУН ЧЫГЪАРЫРГЪА (жал барыргъа) Биреу кимге болса да, ариу сёзюн аямай тилерге, жалыныргъа, жарбаланыргъа.

ЖАЛАН АДАМ Юйюрю, къыйыны болмагъан, кеси башына бош адам.

ЖАЛАН (жаппа-жалан) АЯКЪ (аякълай) КЪАЛЫРГЪА Аякъ кийимсиз болургъа.

ЖАЛАНАЯКЪЛАЙ КЪАЧАРЧА ЭТЕРГЕ Биреуню искилтин этерге, къоркъутургъа, бир жерде онг бермезге, бу жерден къурутургъа.

ЖАЛАН ЖЮРЕКЛИ [адам] 1. Халал, хурметли адам. 2. Аман акъылы болмагъан, айтырыгъын букъдурмай, ачыкъ айтыучу адам.

ЖАЛАНЫНГА КИРГЕН ЖАЛАН ЖАУУНГ (Нарт сёз.) Эр бла къатын деген магъанада.

«ЖАЛАРЫГЪЫ БОЛГЪАН [адам] Къолайы, байлыгъы болгъан, хайыры тиер адам.

ЖАЛБАУУР Эт жаугъа чулгъанып, бауурдан, бюйрекден этилген шишлик.

ЖАЛГЪАН ДАУ Адамгъа ётюрюк, болмагъан затны атау.

ЖАЛГЪАН ДУНИЯ (дин) Керти дуния ахыратды, биз жашагъан дуния хаухду деген магъанада.

ЖАЛГЪАН ПАТЧАХ Патчахны орунуна болжал бла салыннган адам.

ЖАЛДАНЫ СИНГНГЕРГЕ Ичгени татыргъа, эсирирге.

ЖАЛКЪАСЫН КЪАЙЫРЫРГЪА Биреу биреуге къынгыр къараргъа, сюймегенин билдирирге.

ЖАЛЫН ОТДА КЮЕРГЕ (жалында кюерге) Биреу асыры сюйгенден (ачыудан), ичинден жарсыргъа, къыйналыргъа.

ЖАЛЫНДАН ЧЫГЪЫП, ОТХА КИРИРГЕ (ёртеннге, жалын отха) Къыйынлыкъны уллусуна къалыргъа.

ЖАЛЫНДЫ, ОТДУ (Юй жашаудан.) 1. Биреу ишге устады, жигерди деген магъанада.
2. Биреу къызыу ауруйду, температурасы бийикди деген магъанада.

ЖАН АЛЫРГЪА Ёлюрге (адам, жаныуар, къанатлы д.а.к.).

ЖАН АЛЫУЧУ (жаналгъыч) (дин) 1. Муслийман диннге кёре, Израил мёлекни аты. 2. Огъурсуз, къутсуз, эрши адам.

ЖАН АТАРГЪА 1. Биреу кимни болса да, нени болса да бек сюйгенин кёргюзтюрге (ийнакъларгъа, къубултургъа д.а.к.). 2. Бир затха сугъанакълыкъ этерге.3. Бир ишни, къаст этип, битеу къарыуун аямай, талпынып этерге.

ЖАН АУРУТУРГЪА Жазыкъсыныргъа, халаллыкъ этерге.

ЖАН АУУЛГЪА ТЮШЕРГЕ Ёлюп башларгъа.

ЖАН БАГЪАРГЪА Аш-суу керегин табаргъа, жашау этерге, кечинирге.

ЖАН БЕРИРГЕ 1. Ёлюрге (тюзлюк, Ата журт ючюн д.а.к.). 2. Адамны, затны дуниягъа жаратыргъа.

ЖАН БЛА ТЁММЕК (тёнгек, жан-тёммек) БОЛУРГЪА Татлы шуёхла, тенгле болургъа.

ЖАН ДАРМАН 1. Адам бек кюсеген, сюйген зат. 2. Адамны къууандыргъан, кюч берген (адам).

ЖАН ДАРМАНЧА (дарманлай, кибик) [зат] Багъалы, сыйлы зат.

ЖАН ДУККУЛ (туккул, устукку, тёнгек (тёммек) Биреуню бек сюйгенин, эркелетгенин кёргюзтген сёзле.

ЖАН ДУККУЛУ ЧЫГЪАРГЪА (Юй жашаудан.) Асыры къууаннгандан не да къоркъгъандан ёлюр чекге жетерге.

ЖАН ДЫГАЛАС ЭТЕРГЕ (дыгаласха къалыргъа) Амалсызгъа къалыргъа, онгсуз болургъа, жанына къоркъуу тюшерге.

ЖАН-ЖАНЫН АШАРГЪА Къаты ачыуланыргъа, дыгаласха къалыргъа.

ЖАН-ЖАНЫН КЪАРМАРГЪА (чайнаргъа) Дыгалас этерге.

ЖАН ЖЮРЮТЮРГЕ (кечиндирирге) Жашау этерге, баш кечиндирирге.

ЖАН ИЕСИ Жаны болгъан зат.

ЖАН КЕЗЛИК Эр киши биргесине жюрютген кесиучю зат (бичакъ, жюлгюч, къама).
ЖАН КИЙИРИРГЕ (салыргъа) 1. Затны жаны барча ишлерге (суратны, скульптураны д.а.к.), этерге. 2. Затны ишлерча этерге (ремонт этип, жангыртып). 3. Бир зат жангыдан кюч алыргъа.

ЖАН КИРИРГЕ 1. Биреу къууаннгандан жангыдан жаратылгъанча болургъа, тирилирге. 2. Бир зат тирилирге, жангырыргъа, субайланыргъа. 3. Бир зат ишлеп башларгъа.

ЖАН КЪАЗАУАТХА КИРИРГЕ (къазауат этерге) Ёле башларгъа.

ЖАН КЪАЙГЪЫЛЫ БОЛУРГЪА (къайгъыгъа къалыргъа) Ёлеме деп къоркъургъа, аны сагъышын этерге.

ЖАН КЪАЛДЫРГЪАН Адам жанын сакълагъан зат, сёз, болум.

 ЖАН САЛЫРГЪА 1. Аллах жаратыргъа, туудурургъа. 2.Биреуню багъып сау этерге, аякъландырыргъа. 3. Затны, ишни жангыртыргъа, жангыча этерге. 

ЖАН СОЛУУ ЭТЕРГЕ Къысха-къысха солургъа.

ЖАН ТАМЫРЫ (хуууру) Биреуню бек сюйген, багъалы адамы.

ЖАН ТАРТЫРГЪА Ёлюрге.

ЖАН ТАТАХ БОЛУРГЪА (тенгек, тёммек) Бирле татлы шуёх болургъа.

ЖАН ХАРЕКЕТ (Юй жашаудан.) Юйюнде, кюбюрюнде болгъан байлыкъ (къумач, тиширыуну энчи харекети)

ЖАН ЮЛЮШЮ Адамны бек сюйгени (эри, къатыны).

ЖАНАЗЫ НАМАЗ Ёлген адамгъа этилген намаз.

ЖАНДАН-ЖАННГА БОЛУРГЪА Биреуню бек сюерге, татлы тенгле болургъа.
ЖАНДАУУР БОЛУРГЪА Жаны аурургъа, жарсыргъа.

ЖАНЛЫ (бёрю) АУУЗУ БАЙЛАРГЪА (дин) Малны жыртхыч жаныуар ашамазча, дууа окъутургъа.
 (биреу) ЖАНЛЫ БОЛУРГЪА Биреу айтханны, этгенни къорууларгъа, тюзге санаргъа.

ЖАНМЫ КЪАЛДЫРЛЫКЪДЫ? (Юй жашаудан.) Бир затны аллай бир багъалатырча неси барды, жан дарманмыды деген магъанада.

ЖАННЕТ АХЛУСУ (чыпчыгъы, жаннетли) БОЛСУН (дин, тилек) Ол дунияда жаннетде турсун, ахыраты иги болсун деген муслийман тилек.

ЖАННЕТГЕ ЫЧХЫНЫРГЪА Зауукъ жашаугъа тюберге (сунмай, билмей тургъанлай).

ЖАННГАН ОТДАН АРТХА ТУРМАГЪАН (аямагъан) [адам] Жигер, ётгюр адам, не уллу къыйынлыкъдан да къоркъа билмеген адам.

ЖАННГАН ОТДАН ЮЛЮШ АЛГЪАН (аллыкъ) [адам] Жигит, мадарлы адам.

ЖАННГАН ОТХА ЖАУ КЪУЯРГЪА (Юй жашаудан.) Къаугъаны бютюн бек кётюрюрге, къозгъаргъа.

ЖАННГАН ОТХА КИРИРГЕ Жигитлик, таукеллик этерге, бир тюрлю къыйынлыкъдан артха турмазгъа.

ЖАННГАН ОТХА СУУ КЪУЙГЪАНЧА БОЛУРГЪА (этерге) (Юй жашаудан.) Къаугъа, сёз, даулаш селейирге.

ЖАНЫ АЛЛАХХА АМАНАТ БОЛСУН (тилек) Биреу узакъ ёмюрлю болсун, кёп жашасын деген магъанада. 

ЖАНЫ (ким бла, не бла) БИРГЕДИ (бирди) Биреу адамны не да затны бек сюеди, олсуз жашауу жокъду деген магъанада.

ЖАНЫ ЖЕР БЛА ТЕНГ БОЛУРГЪА Мудах болургъа.

ЖАНЫ (жюреги) ЖЕРИНЕ КЕЛИРГЕ (Юй жашаудан.) Хош болургъа.

ЖАНЫ ЖОКЪДУ 1. Биреу къоркъгъандан амалсызды деген магъанада. 2. Бек къысха болгъанды (кече не да кюн) деген магъанада.

ЖАНЫ ИЧИНДЕ БОЛУП ... (болгъан къадарда) Биреу саулукъда ишни этерге къоймазлыгъын билдирир ючюн айтылады.

ЖАНЫ ИЧИНЕ КИРИРГЕ къара: ЖАНЫ (жюреги) ЖЕРИНЕ КЕЛИРГЕ.

ЖАНЫ КЕТЕРГЕ 1. Бек къоркъургъа, абызыраргъа. 2. Биреу сагъайыргъа, бир затха энчи эс бурургъа.

ЖАНЫ КИБИК КЁРЮРГЕ Бек сюерге, багъаларгъа.

ЖАНЫ КИРИРГЕ 1. Биреуню жаратыргъа, чексиз сюерге. 2. Бир затны (хайыуанны, малны д.а.к.) бек жаратыргъа, анга сукъланыргъа.

ЖАНЫ КЮЕРГЕ Ачыу этерге.

ЖАНЫ-КЪАНЫ БЛА (бир ишни этерге) 1. Таза жюрекден, къарыуун, кючюн аямай (ишлерге). 2. Биреуге ышаныргъа. 3. Бир затны айырып, бек сюерге.

ЖАНЫ (биреуню) КЪОЛУНДАДЫ Кимни болса да къадары, жашауу биреуню оноуундады, эркинлигиндеди.

ЖАНЫ КЪУРМАН (къор) БОЛСУН (алгъыш) 1. Биреуге жюрегинден терен ыразылыкъны кёргюзтюп, кёп жашаулу бол деген магъанада. 2. Биреуню хайырындан деген магъанада.

ЖАНЫ САУ БОЛУП  Адам ёлмей, сау болуп тургъанлай деген магъанада.

ЖАНЫ САУЛАЙ ЖАННЕТГЕ ТАШАЙЫРГЪА Зауукълу, насыплы жашаргъа.

ЖАНЫ САУЛАЙ ЖЕРГЕ (кёрге) КЁМЕРГЕ (сугъаргъа) Биреуге уллу къыйынлыкъ жетишдирирге, аны айыплы, бедишли этерге

ЖАНЫ ТАМАГЪЫНА (табанына) ТЫГЪЫЛЫРГЪА (тигелерге). Бек къоркъгъандан онгсуз болургъа. 

ЖАНЫ ТЕМИРДЕНДИ (Юй жашаудан.) Чексиз тёзюмлюдю.

ЖАНЫ ЧЫГЪАРГЪА 1. Амалсыз, онгсуз болургъа (ачдан, арыгъандан д.а.к.). 2. Ёлюп къалыргъа. 

ЖАНЫМ ДА, ТИНИМ ДА... Бек сюйгеним, жаратхан затым деген магъанада.

ЖАНЫМ-КЁЗЮМ 1.Биреуню бек сюйгенин кёргюзтген фраза. 2. Сёз орунуна айтылгъан фраза.

ЖАНЫМЫ ЖЫЛЫТЫРГЪА Къууандырыргъа, насыплы этерге.

ЖАНЫМЫ КЪЫЙЫРЫ Бек сюйгеним деген алдау сёз.

ЖАНЫМЫ НЕ АЛАДЫ ДЕСЕНГ Бек сюймегеними билирге сюе эсенг деген магъанада.

ЖАНЫН АТХАН [адам] Ишден, затдан кючюн аямагъан адам.

ЖАНЫН АЯМАЗГЪА Ёлюмден артха турмазгъа, кюч салып кюреширге.

ЖАНЫН (чыгъарып) БЕРИРГЕ Биреуге жюрек халаллыгъын кёргюзтген фраза.

ЖАНЫН (жюрегин) ЖЕР БЛА ТЕНГ ЭТЕРГЕ Жюрегин къыйнаргъа, мудах этерге.

ЖАНЫН ЖЕРГЕ СУГЪАРГЪА Мудах, шургулу болургъа.

ЖАНЫН КЪАЛДЫРЫРГЪА Ёлюмден къутхарыргъа, сакъларгъа.

ЖАНЫН-КЪАНЫН (жанын) АЯМАГЪАН [адам] Ёлюмден къоркъмагъан, жигит адам.

ЖАНЫН КЪОЛУНА АЛЫП (алдырып) 1. Къыйналып, аман кюнлю болуп (айланыргъа). 2. Къоркъутургъа.

ЖАНЫН КЪУРМАН ЭТЕРГЕ Жашауун берирге, ёлюрге (бир белгили, магъаналы зат ючюн).

ЖАНЫН САКЪЛАРГЪА Жашауун (ёлюмден) сакъларгъа.

ЖАНЫН СУУУРУП АЛЫРГЪА Биреуню арсарсыз ёлтюрюрге.

ЖАНЫН УУУЧХА ЖЫЯРГЪА Чексиз къоркъургъа.

ЖАНЫН ЧЫГЪАРЫРГЪА (къулагъы бла чыгъарыргъа; суууруп чыгъарыргъа; чыгъарып, къолунга берирге). 

ЖАНЫНА АШЫГЪЫРГЪА Ёлеме деп къоркъмазгъа, оюмсуз иш этерге.

ЖАНЫНА БАРЫРГЪА Биреуню къатында асыралыргъа.

ЖАНЫНА ЖЕТГЕНДЕ Биреуню кеси жашаууна къоркъуулукъ тюшгенде.

ЖАНЫНА КЪОРКЪУРГЪА Биреу ёлюмден къоркъургъа.

ЖАНЫНА КЪОРКЪУУ ЖОКЪДУ Биреу бек ауругъанлыкъгъа, иги боллукъду, ёллюк тюйюлдю деген магъанада.

ЖАНЫНА КЪУТУРУРГЪА Кесини жашаууна къоркъуулу иш этерге.

ЖАНЫНА ТИЙМЕЗГЕ Биреуге чюйре сёз айтмазгъа, иш этмезге, жарсытмазгъа.

ЖАНЫНДАН АРТЫКЪ КЁРЮРГЕ Биреуню бек сюерге, багъаларгъа.

ЖАНЫНДАН БОЛУРГЪА Бир ишден эригирге, къыйналыргъа.

ЖАНЫНДАН (бек) СЮЕРГЕ 1. Биреуню бек сюерге, намысын кётюрюрге. 2. Бир затны сайларгъа, бек сюерге.

ЖАНЫНДАН ТОЙГЪАН [адам] Жашаудан тюнгюлген, насыпсыз адам.

ЖАНЫНДАН ТЮНГЮЛЮРГЕ Биреу жашаудан тюнгюлюрге.

ЖАНЫНДАН ЧЫГЪАРЫП АЙТЫРГЪА Ётюрюк айтып къояргъа.

ЖАНЫНДАН ЮЛЮШ ЭТГЕН [адам] Халал, хурметли адам.

ЖАНЫНДАН ЮЛЮШ ЭТЕРГЕ Жюрек халаллыгъын кёргюзтюрге, хурмет этерге.

ЖАНЫНГ КЕТМЕСИН Керексизге къоркъма.

ЖАНЫНГ ЫРАЗЫ Кесинг сюйген.

ЖАНЫНГА КЪАТАЙЫМ (къор болайым) Сенден алгъа ёлейим деген магъанада.

ЖАНЫНГА САДАГЪА Бир затха бек ыразыма деген магъанада.

ЖАНЫНГДАН ТОЯРГЪА Ёллюгюнг келирге деген магъанада.

ЖАНЫЧА КЁРЮРГЕ Биреуню бек сюерге.

ЖАНГЫ АЙ БЛА КЁРЮН (жангы ай бла, жангы айлай) Тансыкъ болгъан адамын кёргенине къууаннганын билдирген фраза.

ЖАНГЫДАН ТУУГЪАНЧА БОЛУРГЪА Бек къууаныргъа, кёлю кётюрюлюрге.

ЖАРАГЪАН КЮЙДЕ Бек къаты, мазаллы, деменгили деген магъанада.

ЖАРАСЫН АШЛАНДЫРЫРГЪА Биреуню жарсыуун, къыйынлыгъын къозгъаргъа.

ЖАРАСЫНА ТУЗ КЪУЯРГЪА (салыргъа, себерге) къара: ЖАРАСЫН АШЛАНДЫРЫРГЪА.

ЖАРАУУ АЧЫЛЫРГЪА Ишни эбине тюшерге, терк ишлерге юйренирге.

ЖАРЛЫ ЮЙНЮ КИШТИГИ КИБИК (киштигинлей, киштиги кибик) Биреуню жарлылыгъын, насыпсызлыгъын кёргюзтген фраза.

ЖАРЛЫЛЫКЪ БАШЛАРЫН КЪЫСХАНЛА Бек жарлыла, кереклерин тапмай къыйналгъанла.

ЖАРЛЫНЫ БУЗОУУ ЁГЮЗЛЮК ЭТЕР (Нарт сёз.) Атасы кетсе, юйню ауурлугъун сабий жашы (къызы) элтир деген магъанада.

ЖАРЛЫНЫ ЖАРГЪА ТЫЙГЪАНЛАЙ (Нарт сёз.) Онгсузну бютюн да аягъын марагъанлай.

ЖАРЛЫНЫ СЁЗЮ ЧАПЫРАКЪДАН ЁТМЕЗ (Нарт сёз.) Жарлы адамны сёзюне эс бурулмаз деген магъанада.

ЖАРТЫ ЖАН ЭТЕРГЕ Малны, жаныуарны терк ёлтюрмей, къыйналырча, жаралы этерге.

ЖАРТЫ ЖОЛДА КЪОЯРГЪА Ишни бошамай, жартылай къояргъа.

ЖАРЫ ЖАЯКЪЛЫ (болургъа) Бек арыкъ, къансыз болургъа.

ЖАРЫ ТОНЛУ [адам] Жарлы, къарыусуз адам.

ЖАРЫКЪ БЕТЛИ (бет бла) Къууанчлы, къууанып, ыразы болуп.

ЖАРЫКЪ БОЛУРГЪА Биреуге бет жарыкълы, ыразылыкъ, къууанч халда тюберге, сёлеширге д.а.к.

ЖАРЫКЪ КЁЛЛЮ [адам] 1. Оюнчу, кюлкючю, лакъырдачы адам. 2. Къууанч халда, женгил (ишлеу).

ЖАРЫКЪ КЮНЮН КЪАРАНГЫ ЭТЕРГЕ Жарсытыргъа, мудах этерге.

Алай жашчыкъны анасы Халимат, не бек келип турса да, тау этегине тюшалмай эди. Ол эди жашчыкъны жарыкъ кюнюн къарангы этген. Мусукаланы С., Хакъ дунияда жолоучула, 334.

ЖАРЫЛА ЭСЕНГ, БУЗУЛ ДЕП (этерге, айтыргъа) Биреуге ачыугъа этерге.

ЖАРЫМ ПАТЧАХ (эски) Патчахны экинчиси, губернатор.

ЖАСТЫГЪЫНА ЖИЛЯН КИРИРГЕ (жау чыгъаргъа) Биреуню къаршы жууугъу билдирмей харамлыкъ, хата этерге.

ЖАСТЫКЪЛЫ БОЛУРГЪА (Юй жашаудан.) 1. Саусуз болургъа, аурургъа. 2. (масхара) Тиширыу сабийден къарыусуз болургъа. 

ЖАССЫ НАМАЗ (дин.) Кече ортада этилген намаз.

ЖАТХАН ЖЕРИ КЕНГ (жумушакъ, мамукъ) БОЛСУН! къара: ЖАННЕТ АХЛУСУ БОЛСУН.

ЖАУ ЖАКЪГЪАНЧА (жагъылгъанча) БОЛУРГЪА Биреу халаллыгъын кёргюзтюрге.

ЖАУ КЕНЕУ ЭТЕРГЕ (Юй жашаудан.) Биреу бир затдан зауукъ этерге. (амалсыздан)

ЖАУ ТЫММЫЛЛА ЭТЕРГЕ (Юй жашаудан.) Адам арт асырауун чыгъарыргъа, берирге.

ЖАУ ЮЛЮШГЕ АЛЫРГЪА Биреуге ачыкъ жаулукъ этерге.

ЖАУБЕРМЕЗНИ ЖАНГЫЗ ТЕКЕСИНЛЕЙ 1. Адамны битеу байлыгъы, ырысхысы, къууанчы деген магъанада. 2. Битеу элге белгили, хар ким да таныгъан (зат, байлыкъ).

ЖАУГЪА БАТЫП, СЮТДЕ ЖУУУНУП (жашаргъа, турургъа д.а.к.) Зауукълу, насыплы жашаргъа.

ЖАУДА БЮЙРЕКЧА (жау ичинде бюйрек кибик) ЖАШАРГЪА Зауукъ жашаргъа.

ЖАУДА ЖИК ИЗЛЕГЕН [адам] (Юй жашаудан.) Кючбюсюреу адам.

ЖАУДАН АРТХА ТУРМАГЪАН, ОКЪДАН КЁЗЮН ЖУММАГЪАН [адам] Батыр, тулпар адам.

ЖАУЛУКЪ АТАРГЪА Урушхан, тюйюшген адамланы жарашдырыргъа (тиширыу жаулугъун арагъа атып).

ЖАУУМ ДА ЭШИТМЕСИН Аллай ачы сёзлени киши эшитмесин.

ЖАУУРЛУГЪУ СЫРТЫНДАН КЕТМЕГЕН (тюшмеген) Къуруда къыйналып, кёп ишлеп жашагъан, жарлы адам.

ЖАУУРЛУКЪ КЕПДИРИРГЕ Жолоучулукъда атны солутургъа

Поделиться: