Терек сатып алырдан алгъа нени билирге тийишлиди

Россельхознадзорну КъМР-де эм Шимал Осетия-Алания Республикада бёлюмюню специалистлери айтханнга кёре, жангы терекчиклени жаз башында эмда кюз артында орнатыргъа болады. Аны себепли аланы,  гюллени эмда айбатлы битимлени, сора дагъыда наныкъ зыгытланы урлукъларын сатыу да ма ол заманлада тири барады.

Къабарты-Малкъаргъа аланы асламысын къоншу регионладан келтириучюдюле, алай республиканы ичинде да быллай зыгытланы ёсдюрюу бла азла кюрешмейдиле. Аны себепли терек сатып алыргъа сюйгенлеге бу ишге уллу эс бурургъа тийишлиди.

Ким да биледи, иги тирлик берген терек бахчаны къурау ол биржыллыкъ иш болмагъанын. Аллындан окъуна этилмей къалгъан жумушла неда терс оноула артда къоранчлагъа келтирлиги, адамны къыйыны да зырафына кетериги баямды.

Бир амал бар эсе, терекчиклени кесигиз билген, ышаннгылы сатыучуладан алыргъа тийишлиди. Ансыз алманы орунуна бир бёлек жылдан жукъгъа да жарамагъан, хайыры болмагъан бош зат ёсерин сюймей эсегиз, терекчиклени къайда болса да, ол санда жол жанларында да сатып алмагъыз. Бек игиси уа -аланы ёсдюрюу бла кюрешген мюлклеге барсагъыз боллукъду. Сатыучуладан а сертификатны сорургъа унутмагъыз.

Быллай къагъытладан биринде терекни сорту, качествосу, къалгъан белгилери да кёргюзтюледи. Карантинный (фитосанитарный) сертификат а республиканы тышындан келтирилген материаллада болады. Къысха айтханда, биринчи сертификат сатыучуну къолунда болжаллы халда болургъа керекди. Ансыз сиз алгъан терекде не битеригине бир тюрлю ышаныу жокъду.

Терекчикни сатып алырдан алгъа бутакъларына да иги къарагъыз. Экижыллыкъны хар бири да 60 сантиметрден къысха болмагъан, жан-жанларына бирча тенг ёсген, кеслери да чапыракъсыз болгъан юч бутакъчыгъы болургъа керекди, тёммегини базыкълыгъы уа эки сантиметрден аз болмазгъа. Сайларгъа тюшсе, кенг бутакълыладан  эсе бёкемирек тамырлары болгъанны алыргъа кюрешигиз. Кеси да юсюнде заранлы къурт-къумурсхалары неда жаралары болмагъанны. Аллай терекни орнатханлыкъгъа, аны чыртда хайыры боллукъ тюйюлдю