Сакъатлагъа къайгъырыу бла

РФ-ни Пенсия фондуну республикада бёлюмю сакъат адамла, фондха келип, жумушларын тамамлаялырча онгла къураугъа энчи магъана береди. Бу ишни бардырыуда ол «жол карта» деген планнга таянады, ол а чекленнген онглары болгъан адамла мекямлагъа, транспортха киргенде, связь бла хайырланнганда, башха жумушларын этгенде тюбеген чурумланы табар эм аланы кетерир муратда жарашдырылгъанды.

Аны бла байламлы фондну жер-жерледе битеу бёлюмлеринде адамланы къайсы къауумлары да ишлерин тыйгъычсыз толтурурча энчи оборудование орнатылады, бу жаны бла халны дайым тинтирча, фондну мекямларына къарап, аланы паспортизациясын бардырырча ишчи къауум къуралгъанды. Аны бла бирге Пенсия фонд сакъатла, фондха келип къыйналмагъанлай, жумушларын «Гражданинни энчи кабинетинде» неда кёп функциялы араланы болушлукълары бла тамамларгъа боллукъларын эсгертеди (ол фондну официальный сайтында барды).