Узакъ сюргюнден къайтханда

Алгъыннгы къыралыбызны бир-бир къуллукъчуларыны терс оноуларыны хаталарындан 1944 жылда мартда малкъар халкъ Орта Азиягъа бла Къазахстаннга кёчюрюлгенди. Анда адамларыбыз шахарлада, элледе жашагъандыла. Заводлада, фабрикалада, къурулуш майданлада, колхозлада ишлегендиле.

Алларына салыннган борчларын тийишлисича тамамлап, кёплери махтаугъа, сыйлы саугъалагъа ие болгъандыла, «Социалист Урунууну Жигити» деген ат берилгенлерибиз да бардыла.

Бу суратда уа биз байракъла да кёребиз. Аланы урунууда болдургъан ахшы кёрюмдюлери ючюн бригадалагъа, колхозлагъа, башха организациялагъа бергендиле. Ала Кёчюучю Къызыл байракъладыла. Аланы тутуп тургъанла да малкъарлы кишиледиле. Бу адамла, биринден къалгъанла, барысы да таулуладыла.

Сюргюнню кезиуюнде Къыргъыстанны Фрунзе областыны Кант районуну Дмитриевка элинде жашагъандыла. Колхозда мал кютгендиле, ийнек саугъандыла, мирзеу ёсдюргендиле. Иги ишлегенлери ючюн берилгендиле байракълада да.

Суратда ортада олтургъан эр киши колхозну председатели Бойкоду. Таулула Кавказгъа къайтхан заманда, аланы ашыра, темир жол станциягъа келген эди. «Была сизни саугъаларыгъыздыла. Элигизге, журтугъузгъа элтигиз», - деп, байракъланы да ол бергенди.

Андан бери алтмыш жылдан атлады. Адамны ёмюрюнде ол да иги кесек заманды. Ол кезиуге къаллай бир тюрлениуле болгъандыла. Жангы журтла ишлендиле, башха жашау къуралды. Ол угъай да, дуния башында бек уллу къыралыбыз да башха тюрлю жол сайлады. Суратдагъы такъыйкъа уа къалгъанды тюрленмей. Анга къарагъанланы сагъышха къалдыра, кимле эдиле бу жигит адамла, къадарлары къалай къуралды деп, оюм этдире.