Коронавирус ючюн бир-бир къыраллагъа турист путёвкаланы къайтарыргъа боллукъду

Талай къыралда, коронавирус жайылып, энчи низам кийирилгени себепли Роспотребнадзор туристлеге эсгертиуле этгенди. Алагъа кёре, «жабылгъан» къыраллагъа путёвкаланы турфирмалагъа къайтарыргъа боллукъду.

Ведомствода айтханларыча, «Россей Федерацияда туризмни мурдорларыны юсюнден» законну 14-чю статьясына тийишлиликде  инсан солургъа барлыкъ къыралда аны саулугъуна эм жашаууна къоркъуу бар эсе,  ол сюдню юсю бла турфирма бла келишимин бузаргъа эркинди. Бусагъатда уа талай жерде адамланы саулукъларына, жашауларына да къоркъуу барды. Хар путёвка ючюн адам фирма бла сёлеширге эм кесине тап мадарны сайларгъа боллукъду. Алай бла, биринчиден, путёвканы болжалын тюрлендирирге, экинчиден а, башха къыралны сайларгъа жарарыкъды. Анга ыразы болмасагъыз, оператор ахчагъызны къайтарыргъа борчлуду.

Алай эсе да, былайда чурумла чыгъадыла. Ала Европада туркомпанияланы офислери бла къонакъ юйле ишлемегенлери бла байламлыдыла, аны ючюн туроператорланы европалы партнёрларындан ахчаны шёндю алыргъа онглары жокъду. Алай отпускугъуз майда неда андан сора эсе, бир кесек сакъларгъа боллукъду, кёп жерде карантин 2 ыйыкъгъа неда бир айгъа созуллукъду.

Законнга тийишлиликде путёвканы багъасы саулай къоркъуу болгъан къыраллагъа эсе къайтарылады, аланы санына Къытай, Италия, Иран, Юг Корея, Испания, Франция, Германия киредиле. Туристледен кеслери «жабылгъан» къыралла да бардыла. Сёз ючюн, Индия, Израиль, Чехия эм башхала. Быллай кезиуледе туроператорла путёвканы багъасындан кеслерини къоранчларын тергеп къайтарадыла.

Алай бла коронавирус ючюн путёвканы къайтаргъанда, турагентге заявленияны жазаргъа, анда Роспотребнадзор берген информациягъа кёре келишимни бузаргъа сюйгенигизни белгилерге тийишлиди. Ол заявленияны туроператоргъа иерикди, жууап он кюнню ичинде келирге керекди. Кёбюсюнде операторла путёвканы башха къыралгъа алышындырыргъа кюрешедиле, адам анга ыразы тюйюл эсе, ала законнга кёре, ол а туристни къоркъуусузлугъун сакълайды, ахчасын артха берирге борчлудула.

Барлыкъ жеригиз туристлеге ачыкъ эсе уа, турну тауусхан келишимге кёре къайтарыргъа боллукъду, алай быллай болумлада оператор кесини къоранчларын тёлетирикди, сюдню болушлугъу да изленирге боллукъду.

 

Кульчаланы Зульфия хазырлагъанды.
Поделиться: