Эришиуню регион урумуна къатышырыкъдыла

Тырныауузда Отарланы Керим атлы 1-чи номерли лицейде жаш назму окъуучуланы «Живая классика» Битеуроссей эришиулерини район уруму къуралгъанды.  Школ кесекде хорлагъан онеки жашчыкъ бла къызчыкъ регион бёлюмде къарыуларын сынар ючюн хунерликлерин аямагъанлай кёргюзтгендиле. Ала тынгылагъанлагъа автор чыгъармагъа сыйындыргъан  оюмун жетдирирге, сыфатха келиширге, шатык окъуу къолайлыкъны хайырланыргъа, суратлау сыфатны толу баямларгъа керек болгъандыла.

Айырмалыланы сайлагъанда, текстни айыра билиуге, сёлешиу усталыкъгъа, сёзлени юйреннгенлерине, къараучуну жюрегине жеталгъанлары бла къалгъанларына, артистлик ышанлагъа эм башха  затлагъа  къаралгъанды. Эсепде жюри  юч алчыны белгилегенди, ала Элбрус районну республикада кёргюзтюрюкдюле.

Тырныауузну  5-чи номерли гимназиясындан  9-чу классны окъуучусу Жанатайланы Азинат бла  алтынчы классчы Жаппуланы Камила, 1-чи номерли лицейден  5-чи классны сохтасы Жаппуланы Расул  сайланнгандыла. Ала  Пауло Коэльону «Вероника решает умереть»,  Чингиз Айтматовну «Плаха» эм Марина Дружининаны «Звоните, вам споют»  деген чыгъармаларындан юзюклени окъугъандыла. Была ючюсю да, белгилегенибизча,  «Живая классика»  эришиуню регион урумуна къатышырыкъдыла.

 

Темирланы Анатолий
Поделиться: