Университетлени къыйматлылыкъларын ачыкълар мурат бла

Март айда Россейни Илму эмда бийик билим бериу министерствосу вузланы магъаналы иш бла кюрешгенлерин ачыкълау жаны бла мониторингни эсеплерин басмалагъанды. Аланы сюзюу а Къабарты-Малкъар къырал университет кесини кёрюмдюлерин игилендиргенин эмда къыйматлы жумушланы аслам бардырыуда орунун кючлендиргенин баямлагъанды.

Мониторинг «Liftup» система-аппаратлы комплексни болушлугъу бла бардырылады. Аны сурамлары бла тенглешдиргенде уа КъМКъУ ёсюуну жолунда болгъанын кёргюзтеди. Ол он лиганы (университетлени айнытыугъа бурулгъан бир ненча проектден къуралады) арасында тёртюнчюдю. Алай бла бардыргъан ишини магъаналылыгъы бла белгили россейли вузла бла конкурентликдеди эмда жылдан-жылгъа айныуу, билим бериуню качествосу жаны бла да ёсе баргъанын ачыкълагъанды.

Сагъынылгъан мониторинг бийик окъуу юйлени билим бериу, илму-тинтиу, халкъла аралы, финанс-экономика, профессор-преподаватель къауумну иш хакъы, инфраструктураны качествосу, регионнга кадрла хазырлауда  оруну жаны бла официал кёрюмдюлени мурдорунда аналитика материалланы къурайды. Алай бла бизни университетге ЕГЭ-ни эсеплерине кёре кирип, бакалавриатны эмда специалитетни программаларына тийишлиликде бюджетде, келишимге кёре да окъугъанланы бир къырал экзаменде алгъан баллары орталыкъ эсеп бла 60.7-ге жетеди.  Андан сора да, кесибизни вузубузну сайлагъанла кёпден-кёп бола барадыла.

Илму-тинтиу ишлени къыйматлылыкълары да эсленирчады. Вузланы тёртюнчю лигасыны порог магъаналы баллы 51,28 эсе, КъМКъУ-да уа ол 191, 78-ди. РИНЦ-ни тизмесине тюшген публикацияланы саны да ёсгенди.

Окъуу юйюбюзню халкъла аралы иши, бирси вузла бла байламлыгъы да 29 процентге бийикге кётюрюлгенди. Тыш къыралладан келип билим алгъан студентлени саны эки кереге чакълы аслам болгъанды. Финанс-экономика жаны бла магъаналылыкъ да – онбир, преподавательлени жалналары да онеки  процентге кёбейгенди.
Андан сора да, окъуу-илму инфраструктураны, билим бериу процессни лаборатория эмда окъуу керекле, компьютер техника бла жалчытылыныулары да эсленирча игиленнгенди. Выпускниклери ишге тохташханларыны юсюнден ачыкъ эсепле ачыкълагъаннга кёре, организацияны  республикагъа кадрла хазырлау жаны бла даражасы да кётюрюлгени белгиленнгенди.