Почтала жангыртыладыла, ишлерин тирилтедиле

Былтыр Къабарты-Малкъарда почтаны   онтёрт  бёлюмю  жангыртылгъанды.  Аладан тёртюсюнде этилмей жарамазлыкъ  жумушла тамамланнгандыла,   онусунда уа  комплексли ремонт бардырылгъанды.  Андан сора да,  Нальчикде Баш почтамтны  арбазында тозурагъан асфальтны орунуна плитка салыннганды. 

Объектле  омакъ этилгенлери бла  бирге,  тири ишлерча да  мадар  этилгенди. Энди тюрлю-тюрлю почта эм банк жумушланы сылтаусуз бардырыргъа жарайды. Ол санда  «Доступная среда» проектни чеклеринде сакъатлагъа тап болурча онгла да къуралгъандыла.    

- Къабарты-Малкъарда жашагъанла  почтаны кёп хайырланадыла.  Былтыр биз    345 559  посылка эм 35  235   регионла эмда  халкъла аралы экспресс-корреспонденция (EMS )  алгъанбыз. 2019 жыл бла тенглешдиргенде, ол биринчи жолда 52 мингнге,  башхасында  уа 59,5 процентге асламды. Арт кезиуледе   ишге  къошула баргъаныны сылтауларындан бири - адамланы Интернет бла сатыу-алыу этгенлериди. Кёп болмай   электрон амалны хайыры бла  жюз мингден аслам адам жашагъан шахарлагъа посылкала   эки, юч кюннге терк жетерча мадар да этилгенди. 

Аны тёрт жылны ичинде  уллу  атламладан бирине санаргъа боллукъду.  Эсепле кёргюзтгенлерича, почтаны ишине сурам уллулай къалады.  Ол ахшы жетишимди дерчады, алай аны бла бирге   качествону ёсдюрюрча, жамауатны кесибизге тартырча  да  аслам зат этиледи, - дейди  КъМР-де  Почта  службаны управлениясыны  таматасы    Заур Вороков. 

 

Магометланы Сулейман.
Поделиться: