Сиз керекли информацияны басмадан, телевидениядан, радиоданмы, огъесе Интернетденми аласыз?

Жангыз да бир он-онбеш жыл мындан алгъа бу соруугъа жаланда бир жууап бериллик эди. Алай къысха кезиуню ичинде техника къыстау айныгъанды, аны бла бирге уа адамланы жашаулары да тюрленнгенди. Мобильный телефонла, электрон-китапла, кючлю компьютерле, Интернет… Биз хар кюнюбюзде да аланы хайырланмай болалмайбыз. Алай бла информацияны тапхан къайда тынчыракъды, ол къайда тюзюрек берилгенин билир ючюн, биз соруу бардыргъанбыз.

 

- Информацияны мен газетледен, телевидениядан алыучума. Алай ахыр заманда Къабарты - Малкъар радиогъа аслам тынгылайма, кесиме керекли затланы да анда табама. Сора, кёп жаш адамлача, Интернетни хайырланмай да болмайма. 

 

- Жангылыкъланы асламысында телевизордан эшитебиз. Иш бла байламлы затланы билир ючюн, библиотекалада китапны табалмасакъ, аны Интернетде излейбиз. Жарсыугъа, бизни библиотекаларыбызны фондларыбыз «жарлыдыла». Сюйсенг, сюймесенг да сетьге кирирге тюшеди. Информация къайда кертиракъды деп сагъыш этгенде уа, телевиденияны неда газетлени сайларыкъма. Нек дегенде Интернетде кёпле, адамлагъа белгили болур ючюн, ётюрюкню жазаргъа артха турмайдыла.

 

- Окъууубуз бла байламлы бизге Интернетге кирирге жарамайды. Информацияны, башха данныйлени библиотекада алабыз. Жангылыкъланы ингирде телевизоргъа къарап билебиз, экстренный билдириулени командирибиз айтыучуду. Сора ишибиз бла байламлы информацияны аскер газетледе окъуучубуз.

 

- Мен Интернетни хайырланыучума. Нек дегенде, анда не тюрлю информацияны, жангылыкъны да тапхан теркди эм тынчды. Телевизоргъа къараргъа, радиогъа тынгыларгъа бла газетлени окъургъа, жарсыугъа, ишим бла байламлы заманым жетмейди. 

 

- Мен Интернетни, башха амалланы да хайырланама. Алай кёбюсюнде керекли информацияны Интернетден алама: телефон къачан да жанымда, сора терк окъуна сетьге кирип, излегенинги табаргъа тынчыракъды. Алай заман аз къорайды. Окъуу бла байламлы уа асламысында библиотекалада китапла алама. Алай алада битеу керекли затланы тапхан къыйыныракъды, мен излеген затла алада болмай да къалыучудула, ол себепден биягъы Интернетге киреме.