Жолдан тынч ётерча боллукъду

Бахсан шахарда 1-чи номерли орта школну къатында   жолну башы бла  жаяу жюрюгенлеге темир кёпюр ишлене турады, деп билдириледи районну администрациясыны пресс-службасындан.

Къурулушну «Прохладный – Азау» федарал  трассаны игилендириуню  чеклеринде Росавтодорну автомашина жоллагъа къарагъан «Кавказ» управлениясы  бардырады. Бусагъатда жолчула  объектни бетондан мурдорун хазырлап бошай турадыла. Ызы темир конструкцияны  жыйып эм жерине орнатып башларыкъдыла.

Кёпюр  атала бла анала эм устазла  Бахсан шахар округну администрациясына  жарсыгъанларындан сора башланнганды. Кюн сайын  машина  аслам эмда къызыу  жюрюген Шуков атлы орам бла   1-чи эм 5-чи номерли орта школлагъа окъуугъа иги кесек сабий барады. Былайлада ётерча «зебрала» эм башха белгиле  болгъанлыкъгъа,  алагъа киши артыкъ эс бурмагъанды,  ол себепден къоркъуусузлукъ да  толусунлай жалчытылынмагъанды.    Мэрияда социал магъаналы проектни узакъгъа  созмай, болумну тюзетирча бир мадар этилирин айтып    «Кавказ» управлениягъа билдиргендиле. Анда уа документ бла шагъырейленнгенлеринден сора   кёпюр сюелтилинсе иги  боллугъунда тохтагъандыла.