Сайлагъан усталыкъларыны жашырынлыкъларына тюшюне

Бу кюнледе Нальчикде «Къурулушчу» колледжде «ВорлдСкиллс Россия» регионла аралы чемпионатны къууанчлы халда жабылыуу озгъанды. Аны хурметли къонакълары уа КъМР-ни Правительствосуну, Билим бериу, илму эмда жаш тёлюню ишлери жаны бла министерствосуну, ведомстволаны келечилери, иш бериучюле да болгъандыла.

Ары келгенлени алларында сёлеше, «Профессионал сообществоланы эмда «Жаш профессионалла» ишчи кадрланы айнытыу агентсво» Союзну кадрланы хазырлау жаны бла генеральный директоруну орунбасары, «ВорлдСкиллс - Россия» Академияны директору Светлана Крайчинская сёлешгенди. Ол конкурсха къатышханланы эмда аланы хазырлагъанланы алгъышлай, жаш тёлюге тутхан ишлеринде юлгюлю болургъа тежегенди эмда эм алгъа ала качествогъа эс бурурларын эсгертгенди.

Билим бериу, илму эмда жаш тёлюню ишлери жаны бла министрни къуллугъун толтургъан Ауес Кумыков а быйылгъы чемпионатны бирси жылладан эсе компетенциялары аслам болгъанларын, анга кёре уа жашла-къызла да эришиуге кёп санда къатышханларын белгилегенди. Андан сора да, бу жол ала жангы оборудование бла хайырланыргъа онг тапханларын ахшы шартха санагъанды.

Ол кесини себеплигин берип, жаш адамла мындан арысында шёндюгюлю технологияла бла жалчытылыннган болумлада конкурслагъа жаланда республикада угъай, федерал даражада окъуна хунерлерин ачыкъларгъа амал болгъанына ийнаннганын билдиргенди. Сагъынылгъан чемпионат регионда энди тёреге айлана баргъанын чертип, Къабарты-Малкъарны бирсилеге кёргюзтюрча, сынам жаны бла байламлыкъны жюрютюрча амалы болгъанына ышандыргъанды.

Хорлагъанланы эмда призёрланы белгилерни аллында уа жыйылгъанла 22 тюрлю  компетенциядан бардырылгъан эришиуледен репортажгъа къарагъандыла. Ызы бла уа хычыуун жумуш бардырылгъанды.

Чертип айтханда, КъМКъУ-ну студентлери юч бёлюмде  да айырмалы жерлеге тийишли кёрюлгендиле. Алай бла саугъаланнганланы санында «Школгъа дери билим бериуде, Газаланы Саида ючюнчю жерни алгъанды. «Башланнган класслада окъутууда» уа Аккыланы Фатимат экинчи оруннга чыкъгъанды.

Таулу жашла Чапаланы Алим (биринчи жер), Балаланы Александр (экинчи жер), Гюлюйланы Солтан (ючюнчю жер) «Къургъакъ къурулуш эмда штукатур ишле» компетенциягъа къатышхандыла. Ала барысы да къонакъбай окъуу юйде билим аладыла.

«Моданы технологиясында» да бу жол кёпле хунерлерин сюйюп кёргюзтгендиле. Аланы  арасында Гюлюйланы Диана да болгъанды. Къызчыкъ Элбрус регион колледжде усталыкъгъа юйренеди.

Чемпионатда «Осетин пирогланы бишириу» деген компетенция да болгъанды. Анда уа таулу къызчыкъ Ёзюкланы Салима биринчи жерни алгъанды. Ол сатыу-алыу – технологиялы колледжни окъуучусуду.

Чемпионатны жабылыууна келгенлени республиканы эстрадасыны жырчылары, сабий чыгъармачылыкъ къауумлары, «Арабеск», «Асса», «Шагди», «Искорки» ансамбльле, бирсиле да алгъышлагъандыла. Хорлагъанла уа энди федерал округдагъы кесегине къатышырыкъдыла. Аланы арасында уа къырал даражалы урумуна барлыкъла да чыгъарла деп ышанабыз.