Бар ахшылыкъла да сизге - анала, эгечле, къызла!

Тиширыуланы халкъла аралы кюнюне жораланып,  Нальчикде  Къырал концерт залда уллу концерт болгъанды.  Анга келгенле бек алгъа  фойеде   сабийле ишлеген суратладан "Мени багъалы анам!" деген    уллу да , сейирлик  да кёрмючге къарап, зауукълукъ тапхандыла. Миллет кийимлери бла сюелген гитче жашчыкъла уа хар къонакъгъа гюлле,  конфетле да  бергендиле.

Мекямны экинчи къатысында уа  гюль арка  хар киргенни кёзюне олсагъат уруна эди. Кёпле аны къатында суратха тюшгендиле. Анда дагъыда тиширыулагъа, аналагъа, къызлагъа  деп,  жюрекни къууандыргъан, кёлню кётюрген макъамла, жырла да эшитилгендиле.

Къууанчлы ингирге Парламентни Председателини орунбасары Жанатайланы Салим, КъМР-ни  Башчысыны Администрациясыны таматасы Мухамед Кодзоков, КъМР-ни  Башчысыны экономика вопросла жаны бла кенгешчиси Уяналаны Аминат, министерстволаны бла ведомстволаны тюрлю-тюрлю организацияланы, шахарланы, районланы администрацияларыны келечилери да келгендиле.  

Мухамед Кодзоков  республиканы Башчысы  Казбек Коковну   алгъышлау сёзюн окъугъанды. Кеси да, залда олтургъанлагъа айланып, ыспас этгенди, ыразылыгъын билдиргенди, республиканы оноучуларыны атындан КъМР-ни Тиширыуларыны союзуну башчысы Ауалиат Каскуловагъа, аны бетинден а битеу  тиширыулагъа   акъ розаладан жарашдырылгъан уллу  къысымны бергенди.

Концерт а "Сенича дунияда  жокъду!" деген хореография композициядан бла жырдан  башланнганды. Аны музыкалы театрны солистлери Азамат Цавкилов, Азамат Евазов, Атталаны Азнор, Жамал Теунов, Ислам Макоев, Мурат Сонов, Замир Катанчиев айтхандыла. Уллу  экранда уа "Жаз башыны чакъгъан тереклери" деген видеоролик кёргюзтюлгенди. Дагъыда  сахнагъа  онтёрт эр кишиден къуралгъан ансамбль  чыгъып, битеу аналагъа, эгечлеге, юй бийчелеге атап жыр айтханды.

Къууанчлы ингирде асламында эр кишиле жырлагъанларын белгилерчады. Аланы араларында "Ийман" къауум,  Габаланы Тенгиз, Жаникаланы Эльдар, КъМР-ни эм Адыгея Республиканы сыйлы артисти Тимур Гуазов,  КъМР-ни  сыйлы артистлери Текуланы Амур, Азамат Беков, Азамат Цавкилов, Султан Хажироко, музыкалы театрны солистлери Рустам Абаноков,  Алим Пачев, узакъгъа созулгъан къарслагъа тийишли болгъандыла. Бир къауум жырчыла уа Стас Михаиловну "Хар зат да  санга" деген белгили жырын  сахна оюнча къурап  айтхандыла.

"Каллисто" ансамбльни солистлери  Лина Мафедзовагъа бла Роман Романихиннге, Имран Бляшевге бла Атабийланы Маликагъа,  дагъыда башхалагъа залдагъыла бютюн   жарыкъ тюбегендиле. Сахнагъа  сабийчикле  чыкъгъанда уа, аланы бетлери бютюн жарыкъ болгъандыла, къарслары бютюн  къыстау урулгъандыла. Нальчикде 15-чи номерли сабий саддан, Май районда "Феникс" жыр студиядан, "Нальцук",  "Шагди", "Ассорти", "Кюнчюкле" юлгюлю тепсеу ансамбльледен  хунерли балачыкъла назмула айтып, жырлап, тепсеп да къараучуланы къууандыргъандыла.

"Балкария"  къырал фольклор этнография  эмда  "Кабардинка" къырал академиялы тепсеу  ансамбльле, "Терские казаки" жыр-тепсеу къауум да, хар замандача, байрамгъа къууат салгъандыла.

Сёзсюз, Уллу Ата журт урушда Хорламны келтирген тиширыуланы атлары да унутулуп къалмагъанды ол ингирде. Уллу экранда аланы суратлары кёрюннгендиле, алагъа аталып жырла, назмула да айтылгъандыла.
Къууанчлы ингир "Битеу тиширыула ючюн"   деген жарыкъ жыр бла бошалгъанды. Аны да  концертге къатышханла барысы да бирден айтхандыла.

Холаланы Марзият.
Поделиться: