«Орамда танымагъан адамла келип, ыразылыкъларын айтсала, жашауумда тюз сайлау этгеними ангылайма»

Бёзюланы Магомед жашаууну асламын КъМР-ни От тюшюуге къажау-къутхарыу службасына бергенди.  Бу сабыр, жууаш, тынч адам бир кезиуде республикада аты айтылгъан от ёчюлтюучю болгъанына, ол кёплени отдан чыгъаргъанына ийнаннган да къыйынды.  Алай аны ишчи жолунда тюбеген сынауланы, къутхарыуланы юслеринден китап окъуна жазаргъа боллукъду.

От тюшюуге къажау службагъа нёгери Аналаны Мусабий бла бирге Магомед 1984 жылда келгенди. Артда эки жаш да бирге кёп операциялагъа къатышхандыла, адамланы къыйын болумладан къутхаргъандыла. Ма, сёз ючюн, Магомедни эсинде бир жарсыулу иш къалгъанды. Бир жол Нальчикде Шогенцуков орамла беш къатлы юйде фатарладан бирине от тюшгенини юсюнден билдириу келеди. Мычымай  от ёчюлтюучюле алайгъа жетедиле. Магомед от алгъан фатардан кесинлей эки къызны  чыгъаргъан эди ол кюн.

Анга энчи юйледен биринден сакъат эр кишини къутхарыргъа тюшгенди. Ол   кесине болушлукъ ахырда эталлыкъ тюйюл эди – эки аягъы да жокъ…  Магомед аны  къолуна алып чыгъаргъанды ол къыйынлыкъдан. Быллай сейир шартла асыры кёпден, Бёзю улу алагъа юйренчек болуп къалгъаннга да ушайды – адамны жанын сакълау харкюнлюк ишге бурулгъанды.

Службаны ветеранларыны, баям, нальчикчилени да эслеринде озгъан ёмюрню 90-чы жылларыны ахырында Къулийланы Къайсын атлы орамда 16-къатлы юйде болгъан къаугъалы болум эслеринде кёп жыллагъа къалгъанды. Бёзюланы Борис ол кюн ишде эди. 1-чи номерли  бёлюмге от тюшгенини юсюнден билдириу 8 сагъатда 44 минутда келеди. Алайгъа жетгенлеринде, специалистле ток ыз кюйгенин ачыкълайдыла. Тютюн асыры къалындан эм ачы ийис келгенден,  адамла бек къоркъадыла. Басхыч бла мекямдан тышына чыгъар онг жокъ – тютюн алыпды. Лифт бла хайырланыргъа жарамайды, алай аны ёчюлтген кезиуде уа ичинде бир эр киши къалады. Халкъ балконлагъа чыгъып, болушлукъ сакълайдыла.  

Бёзю улу башчылыкъ этген къауум ачыкъ отну ёчюлтюп, адамланы къутхарып башлайдыла. Биринчиден, лифтни эшигин сындырып, анда къалгъан кишини эркин этедиле,  ызы бла бир къатдан башхасына кётюрюле, къутхарыучула адамланы фатарладан чыгъарадыла. Керек болгъанлагъа биринчи болушлукъ эте, солуялмагъанлагъа кислород маскала кийдире, адамланы къоркъуусуз жерге ашырадыла.   «Ол кезиуде мени не зат сейир этдиргенди десегиз, сабийле ахырда къоркъмагъандыла, ата-аналарыча къайгъыгъа къалмай, айтханыбызны терк этгендиле»,-деп эсгереди ол.

Ол кюн къутхарыучуларыбызны профессионал ишлерини, жигитликлерини хайырындан 16 - къатлы юйде бир инсан да ачымагъанды.  Ала юйден 250 адамны къоркъуусуз жерге ашырып, саулукъларын, жанларын да сакълагъандыла. Бёзюланы Магомед а анда кёргюзтген батырлыгъы, ишчи сынауу ючюн «За спасение погибавших» деген майдал бла саугъаланнганды.

- Мен от ёчюлтюулеге бармагъанлы кёп заман озгъанды, бюгюнлюкде  ишим башха борчла бла байламлыды. Алай шахарда танымагъан адамла келип, къолуму тутуп, сау бол, сени мени жашауму сакълагъа эдинг деселе, бек сейир этеме. Жылла озгъан эселе да, эслеринде тутадыла, сау болсунла, ол кёлюмю бек кётюреди, къууандырады. Ма ол заманда ангылайма жашауумда усталыкъны тюз сайлагъанымы,-дейди ол ушагъыбызны кезиуюнде.