Геккиланы Заур - СНГ-ни Парламентле аралы ассамблеясыны комиссиясыны жыйылыууна къатышханды

СНГ-ни Парламентле аралы ассамблеясыны Санкт-Петербургда бардырылгъан ишлерини чеклеринде аны дайым комиссияларыны жыйылыуу болгъанды. Аладан бирини - политика соруула эмда халкъла аралы бирге ишлеу жаны бла къауумуну - кенгешине РФ-ни Къырал Думасыны депутаты Геккиланы Заур да къатышханды.

Анда битеу да 15 соруу сюзюлгенди.Ол санда СНГ-ни къыралларыны келечилерини халкъла аралы парламент организацияланы ишлерине бютюн тири къатышырча, аны къыйматы ёсерча этиуню, коррупциягъа къажау конференция бардырыуну амалларына къаралгъанды. Дагъыда комиссияны 2019 жылда ишини эсеплери да чыгъарылгъандыла.

Жыйылыугъа къатышханла Парламентле аралы ассамблеягъа кирген къыралланы Уллу Хорламны 75-жыллыгъын байрамлаугъа уллу эс бургъандыла. Геккиланы Заур айтханнга кёре, СНГ-ни Парламентле аралы ассамблеясыны совети бу сыйлы кюнню белгилеуню планын жарашдыргъанды. Анга кёре халкъла аралы конференцияла, тюрлю-тюрлю гуманитар акцияла бла медиапроектле бардырыллыкъдыла.