Аз тюбеген ауруудан къыйналгъан сабийлени къайгъысын кёре

КъМР-ни Парламентини президиумуну кезиулю жыйылыуу Татьяна Егорованы башчылыгъында бардырылгъанды. Анда сёз республиканы законла чыгъарыучу органыны РФ-ни урунуу эмда социал къоруулау министри А.О.Котяковха обращениясыны юсюнден баргъанды. Депутатла андан фенилкетонуриядан ауругъан сабийлеге инвалидностьлукъну алагъа 18 жыл толгъунчу тохташдырылырын тилегендиле.

Парламентни Урунуу, социал политика эмда саулукъ сакълау жаны бла комитетини таматасы Х.Х.Кажаров ангылатханнга кёре, фенилкетонурия - ол бек къоркъуулу аурууду, аллай саусузгъа тийишлисича багъылмаса, ол ёлюп къалыргъа неда акъылдан шашаргъа боллукъду. Къабарты-Малкъарда андан 25 адам къыйналады, аладан 21 акъылбалыкъ болмагъанладыла. Бюгюнлюкде медицина- социал экспертизаны учреждениялары аллай ауруудан ауругъанлагъа инвалидликни 14 жылына дери тохташдырадыла. Ол жыл сандан башлап саусуз белокну ёлчемин мардагъа кеси келтираллыкъды, ашын да айырлыкъды деп  аллай оюм барды.

- Алай сабий ол жыл санда къыйын ауругъанын толусунлай сезалмайды, анга контроль да эталмайды. Инвалидлиги кетерилсе уа, социал пенсия бир кере берилиучюдю. Ахча болушлукъну, социал жумушланы, керекли льготаланы да алалмайды. Ата-анала да саусуз сабийге къарагъанлары ючюн пособиядан, юйюр законодательство бла тийишли льготаладан къуру къаладыла. Ол а юйюрню болумун, ауругъан сабийни халин да осалгъа къалдырады. Аны бла байламлы комитет обращение жарашдыргъанды, анда медицина-социал экспертиза хайырланнган мардаланы тюрлендиририн, фенилкетонуриядан ауругъаннга инвалидликни 18 жылгъа дери тохташдырылырын тилегенди, -деп билдиргенди Х.Кажаров.

Аллай обращенияны проектин жарашдырыуну башламчылыгъы «тёгерек столдан» сора этилгенди. Анга уа ол аз тюбеген къыйын ауруулары болгъан сабийле, аланы ата-аналары, тийишли республикалы ведомстволаны келечилери да къатышхандыла. Андан сора да, бу ишге Урунуу, социал политика эмда саулукъ сакълау жаны бла комитетни жыйылыуларында, инсанла бла тюбешиуледе да сюзюлгендиле. Проект КъМР-ни Парламентини депутатларыны къарауларына ала да эсгертиулерин бла оюмларын билдирир ючюн берилгенди. Документ тынгылы жарашдырылгъандан сора, аны Парламентни быйыл 12 мартда бардырыллыкъ жыйылыуунда сюзюллюкдю. Андан сора уа РФ-ни урунуу эмда социал къоруулау министри А.О.Котяковха жиберилликди.

Президиумну жыйылыуунда депутатла федерал законланы проектлерине, РФ-ни башха субъектлерини Налог кодексге тюрлениуле кийириуню юсюнден башламчылыкъларына бла обращенияларына къарагъандыла, башха законланы да сюзгендиле, деп билдиргендиле КЪМР-ни Парламентини пресс-службасындан.