Игилик этсенг, кесинг да иги боласа

Окъуучуланы илму-техника чыгъармачылыкъларыны республикалы арасында «Лидер-Центр» жаш тёлю жамауат биригиуню алты жылны ичинде этген ишлерин санап чыгъар ючюн кёп заман керекди.  «Биз жандауурлукъ, экология жаны бла да кёп тюрлю жумушла этебиз,-дейди бу махкемени  президенти Улбашланы Мариям.- Ёксюзле, къартла тургъан юйлеге, сакъат сабийлени «Эдельвейс» клубларына, башха жерлеге да барып,  къолубуздан келген  болушлукъну этебиз».

Ол айтханнга кёре, жаш тёлю биригиуге киргенлени   акъылбалыкъ болмагъанла тургъан колониягъа баргъанлары жюреклерин бютюн къозгъагъанды.   «Алагъа болушлукъ керек болгъанын  танышларыбызгъа, шуёхларыбызгъа да билдиргенбиз,-деп бардырады хапарын ол.- Угъай деген чыкъмагъанды. Биз ары  татлы ашарыкъла, жюн чындайла, ёрге жанла алып элтгенбиз, концерт да кёргюзтгенбиз. Ала бек къууаннгандыла. Бизни бла сюйюп ушакъ этгендиле, кеслери да жырлагъандыла, тепсегендиле. Анда ишлеген психолог а: «Мен эки жылны ичинде тындыралмагъанымы сиз бир ненча сагъатха этгенсиз»,- дегенди.

Экология ишлери уа, Мариям айтханнга кёре,«Паркланы маршы» деген битеуроссей акциягъа къатышыу бла байламлыды. Минги тауну тийресинде миллет паркны, Чирик кёлню къатында талай жерни  тазалаугъа  жаш тёлю тири къатышады.  Алгъаракълада уа «Жерибиз ариу, таза болурча этейик» деген программагъа кёре Чегем шахарны  суу жагъаларын  кир-кипчикден ариулагъандыла. Алагъа  Нальчикде 28-чи, Адиюхда 3-чю  эмда Чегем шахарда 2-чи номерли  мектеплени окъуучулары да къошулгъандыла. Школлада бла жай лагерьледе семинар-кенгешле бардырыргъа да белгиленеди.

-Баш муратыбыз -  шуёхлукъну кючлендирирге, билимни ёсдюрюрге, башчылыкъ эте билирге да юйретирге. Биз ишлеген алты  жылны ичинде ол жаны бла иги сынау жыйышдыргъанбыз,-дейди Мариям.

Битеу тамамланылгъан ишледен а ол  «Кеси ыразылыгъы бла» дегеннге энчи кёзден къарагъанын да айтханды.  Аны оюмуна кёре,ол кёп жаны бла хайырлыды: адамлагъа ахшылыкъ эте, кесинг да иги, чомарт боласа, къаллай болса да бир  усталыкъ аласа. -Биз  шахарда, анга  жууукъ элледе да   жангыз къалгъан къартлагъа барып, бахчаларын къазабыз, керек болса, урлукъ да салабыз, сюртюу-бояу жумушланы да тындырабыз.Ёксюзле тургъан юйге барсагъ а, алагъа аш-азыкъ ашатабыз, аланы кийиндиребиз, эшикге чыгъарып да жубатабыз,-деп бардырады хапарын Мариям.

«Лидер-Центр» мындан ары этерик ишлерини планларыны  юслеринден айта, ол аланы волонтёрла бла бирге  тюрлю-тюрлю   акциялагъа къатышыр,ол санда Элбрусну тийресинде турист базалада, солуу лагерьледе школчула, студентле бла да семинар-кенгешле бардырыр умутлары болгъанын билдиргенди. «Къысхасы, биз «Ахшылыкъ этсенг, кесинг да иги боласа» деген чакъырыуну башчылыкъгъа алып бардырабыз ишибизни»,-дегенди.