Омакъ садик ишленнгенликге, къоркъуусузлукъгъа эс бурулмагъанды

Кёп болмай социал сетьледе    Акъ-Сууну  жангы микрорайонунда ишленнген    садикни тийресинде къоркъуусузлукъ жалчытылынырча мадар этилмегенин айтып жазгъандыла эмда болумну видеогъа тюшюрюп салгъандыла.  

Омакъ садик ишлегендиле, жолну жангыртхандыла, алай тоатуарла салыргъа уа унутхандыла. Кюн сайын былайлада жашагъанла сабийлерин машина аслам эм къызыу жюрюген Биттир улу орамны юсю бла келтирирге тюшедиле.  Андан сора да, быллай социал магъаналы учрежденияны тийресинде  адамла ётерча переход да этилмегенди эм кече жарытырча чыракъла да жокъдула.  Ол себепден барысын да эсге алсакъ,  жалан  водительлени сакъ болурларына  ышаныргъа къалады.   

- Баям, биреулен бир хатагъа тюшгюнчю  сакълай болурла.  Бу болум бир  жыл чакълы барады. Таматала анга эс нек бурмайдыла?- деп  жазадыла Интернетде  адамла да.
Нальчик шахарны администрациясындан  билдиргенлерине кёре уа, жол регион магъаналыды. Ол себепден кемчиликлени юсюнден КъМР-ни Къурулуш эмда жашау журт-коммунал мюлк министерствосуна билдирилгенди.