Пенсия алыр заманына дери ауушханны жууукъларына – ахча тёлеуле

Былтыр Россейни Пенсия фондуну регионда бёлюмю ёлген пенсиячыланы жууукъларына 9 миллион 150 минг 093 сом тёлегенди. Бу ахча адамны ахлуларына, ол пенсия алыр заманына дери жашамай ауушхан эсе, пенсиясыны фондда жыйылгъан накопительный кесегинден бериледи.

Быллай тёлеуле Россейни Правительствосуну 2014 жылны 30-чу июлюнда къабыл кёрюлген бегимине тийишлиликде этиледиле. Аланы алыр ючюн, инсанны пенсиясыны кесеги къайсы фондда ( къырал неда коммерциялы) жыйылгъан эсе да, заявленияны ары жазаргъа керекди. Застрахованный инсанны жууукъларындан келген документле фондда жарым жылны ичинде жыйышдырыладыла, жетинчи айда тёлеулени бериуню неда къалыуну юсюнден оноу чыгъарылады. Заявление къабыл кёрюлсе, ахча оноу чыкъгъандан сора экинчи айны 20-чы кюнюнден кеч къалмай берилип башланады. Адамла бу болжалны ичинде къагъытланы жыяргъа, заявленияны жазаргъа жетишмеселе, тёлеулени сюдню оноуу бла алыргъа боллукъдула.

Ёлген адамны пенсиясын законнга тийишлиликде бек алгъа, сабийлери, юй бийчеси неда эри, ата-анасы алыргъа эркиндиле. Аладан сора аппала бла аммала, къарындаш-эгечле, туудукъла барадыла. Ахча жууукълагъа, аланы жыл санларына, ишлегенлерине бла къалгъанларына къарамай, тенг юлешинип бериледи.

2019 жылда фонд аллай 459 заявленияны кабыл кёргенди, ёлгенлени жууукъ-ахлуларына орта эсеп бла 19200-шер сом берилгенди.