Жаннетге кирирге онг берген жумушла

Бир жол Мухаммадха, Аллахны саламы анга болсун, араплы: «Жаннетге кирир ючюн къаллай жумуш этерге кереклисин ангыласанг эди, аны къайтарып турлукъма»,-деп сорады.  Файгъамбарны жууабы былай болгъанды: «Аллахха баш ур (жангыз анга), анга нёгер излеме, борч болгъан намазны къыл, зекятны тёле эмда Рамазанда ораза тут» (Абу Хурайра).

Алай бла файгъамбар ислам динни беш мурдорлу шартларындан тёртюсюн санагъанды. Алагъа уа энтта хаж къылыу да киреди. Аны юсюнден а Къуранны аятларында айтылады, сёз ючюн, «Имранны юйюрю» сурана 97-чи аятында.

Жууапны эшитгенлей, араплы: «Мени жаным къор болгъан бла ант этеме, алагъа жукъ да къошарыкъ тюйюлме»,-деп къууанады. Ол кетгенден сора Мухаммад: «Жаннетге кирликлени кёрюрге сюйген бу адамгъа къарасын»,-дейди.

Мухаммадны, Аллахны саламы анга болсун, быллай магъананы ангылатхан хадислери энтта бардыла. Ала барысы да адам муслийманлагъа борч болгъан шартланы (фард альайн) эмда жамауатда энчи къауумла толтурургъа тийишли жумушланы (фард аль-кифайа) тамамласа, эркин этилмеген затладан кесин кери тутса,  жаханим отундан сакъланып, жаннетге кирликлени санында боллугъун ангылатадыла. Быллай ышанлары болгъан керти муслийманды, аны ийманы къатыды, ол тюз жол бла баргъанланы арасындады.