Интернационалист аскерчини намысына – тёрели турнир

Бызынгыда афган урушда жоюлгъан интернационалист аскерчи Жазыколаны Исхакъны хурметине волейболдан къатыш командаланы араларында тёрели 33-чю турнир ётгенди. Бу жол анга республиканы Зольск, Лескен, Чегем, Черек районларындан бла Нальчикден эм кючлю спортчула къатышхандыла, деп билдиргендиле Черек районну администрациясыны пресс-службасындан.

Эришиуле башланырны аллында къонакъланы бла волейболчуланы район администрацияны башчысыны орунбасары, районну волейболдан федерациясыны таматасы Тогъузаланы Юсюп, физкультура, спорт эмда жамауат организацияла жаны бла комитетни оноучусу Аккыланы Хасан, Жазыколаны Исхакъны жууукълары, элчилери да алгъышлагъандыла.

Спортчула  алагъа къарагъанла жаратырча ариу оюн кёргюзтгендиле. Къаты кюрешде биринчи жерге Нальчикни командасы чыкъгъанды, экинчи Чегем район болгъанды, ючюнчю жер а Лескен районну командасына жетгенди. Ала кубокла, майдалла эмда Черек районну администрациясыны грамоталары бла саугъаланнгандыла.  

Физкультура эм спорт жаны бла комитет Бызынгыны башчысы Чочайланы Зуфаргъа бла ол элни мектебини директору Хапаланы Тахирге турнирни бардырыргъа себеплик этгенлери ючюн ыспас этгенин билдиреди.

Эсгертиу:Жазыколаны Магометни жашы Исхакъ 1963 жылда туугъанды. Аскерге 1982 жылда чакъырылгъанды. Афганистанда 1983 жылда жоюлгъанды. Къызыл Жулдузну ордени бла саугъаланнганды (ёлгенден сора). Туугъан элинде орамладан бирине аны аты аталгъанды.