Ишчини урунуу борчларын аны ыразылыгъы болмай тюрлендирирге жарамайды

Россейни Конституциялы сюдю РФ-ни Урунуу кодексини 370-чи статьясыны 5-чи эм 6-чы кесеклери Конституциягъа келишгенлерин бла къалгъанларын сюзгенди. Ол жаны бла тарыгъыуну сюдге  профсоюзланы   урунууну праволу инспектору А.Хмелевскихден келгенди.

Анда айтылгъаныча, бу къуллукъладан сора да анга техника инспекторну жумушларын толтурургъа буюргъандыла, алай эр киши унамагъанды. Аны сылтаугъа алып, Хмелевскихни ишден къыстагъандыла.

Конституциялы сюд РФ-ни Урунуу кодексини белгиленнген статьясы (урунууну праволу инспекторуну эркинликлери) урунууну инспекторуна техника жаны бла инспекторну борчларын къошаргъа, унамаса уа, ишден кетерирге онг бермегенин тохташдыргъанды.

Ишчиге урунуу келишимде белгиленмеген жумушланы  буюрур ючюн а бир ненча жорукъну сакъларгъа керекди. Ала РФ-ни Урунуу эм социал къоруулау министерствосу 2016 жылда 20 июльда къабыл кёрген бегиминде бардыла. Алагъа тийишлиликде  ишчиге къошакъ борчла бериле эселе, аны бла келишим этилирге, аны жангы иши бла шагъырейлендирирге керекди. Келишимде уа  къошакъ иш ючюн къаллай хакъ тёлениригини, бу къуллукъну ненча заманны толтурлугъуну жазыладыла. Дагъыда ишчиге жангы борчла къошулгъанларыны юсюнден бегим чыгъарылады.

Урунуу законланы сакъламагъан  иш бериучю РФ-ни Административ бузукълукъланы кодексини 5.27-чи статьясыны 1-чи кесегине кёре жууапха тартыллыкъды.