Аманлыкъланы ауурлукъларын букъдуруу шартла кёбейгендиле

КъМР-ни прокуратурасында праволу статистика, информация технологияла эм информацияны къоруулау бёлюмюню былтыр ишини эсеплери чыгъарылгъандыла. Анга аталгъан кенгешни надзор ведомствону башчысыны орунбасары Юрий Лаврешин бардыргъанды.

2019 жылда уголовно-праволу статистика бла байламлы 6,3 мингден аслам бузукълукъ этилгени ачыкъланнганды. Тюзлюкню тохташдырыр, статистиканы тюзетир мурат бла 471 прокурор эсгертиу этилгенди, алагъа кёре 147 къуллукъчу дисциплина жууапха  тартылгъандыла.

Аманлыкъланы ауурлукъларын, социал магъаналарын терс кёргюзтген кезиуле 28,6 процентге кёбейгенлерин ачыкълагъандыла прокурорла. 2018 жылда аллай шартла 3,8 минг болгъан эселе, былтыр а 4,9 мингнге жетгендиле. Быллай кемчиликлени РФ-ни СК-сыны КъМР-да следствие управлениясы, Ич ишле министерство, УФСБ, Сюд приставланы федерал службасыны Управлениясы болдургъандыла.

Кенгешде быйыл тамамланыллыкъ ишле белгиленнгендиле. Ахырында Юрий Лаврешин надзор жумушланы хайырлылыкъларын игилендириу, уголовно-праволу статистиканы тюз жарашдырыу жаны бла эсгертиуле этгенди.