Энергетикле суула кётюрюлюр кезиуге хазырдыла

Жаз башында эмда жайда  суула кётюрюлген кезиуледе хайырланыучуланы ток бла ышаннгылы жалчытыугъа «Россети Шимал Кавказ» компанияны Къабарты-Малкъарда бёлюмюнде энчи магъана бериледи. Ма бу кюнледе «Каббалкэнергону» специалистлерини къауумундан тийишли комиссия къуралгъанды. Ол ызы бла не мадар этерге кереклисин, аланы болжалын да белгилегенди.

Энергокомпанияны электрокюч мюлкюню иги кесеги череклени жанларында орналадыла. Ала кётюрюлюп тебирегенде,  алагъа да къоркъуу чыгъады. Быйыл бегирекда ВЛ-110 кВ Л-9 Кахун - Эски Лескен, ВЛ-110 кВ Л-104 Водозабор – Нальчик, ВЛ-35 кВ Л-460 Чегем-2 – Лячинкъая ызлагъа эс бурургъа, алада бир талай чыпынланы мурдорун кючлендирирге тюшерикди.

Специалистле ырхы сууланы тыйгъан, жагъаланы тозураудан сора дагъыда жер кёчюуден сакълагъан сооружениялагъа да къарап чыкъгъандыла. Табылгъан кемчиликлени узакъгъа созмай кетерирге оноулашхандыла.

Быллай кезиуледе Гидрометеорология службадан эмда МЧС-ни КъМР-де бёлюмюнден информация хайырланады. Компанияны кесинде да энчи техника, машинала эмда механизмле хазырланадыла, тийишли бригадала къураладыла, алагъа инструктаж бардырылады.