Ялтада конференцияны къоркъуусузлугъун жалчытыугъа бизни жерлешибиз да къатышханды

Т.К.Мальбахов атлы къырал миллет библиотекада Ялтада болгъан конференцияны 75-жыллыгъына аталгъан уллу жыйылыу ётгенди. СССР-ни, АБШ-ны бла Великобританияны башчыларыны битеу дуниягъа да уллу магъананы тутхан ол тюбешиулерини юсюнден билдириу бла китапхананы оноучусу, филология илмуланы доктору, профессор Анатолий Емузов сёлешгенди. 

Ол конференцияда мамырлыкъны бла къоркъуусузлукъну сакълар ючюн бирге энчи халкъла аралы организация къураугъа энчи эс бурулгъанын айырып айтханды. Алай бла 1945 жылда 25 апрельде Сан-Францискода Бирикген Миллетлени конференциясы жыйыллыгъыны, анда организацияны уставы жарашдырыллыгъыны юсюнден оноу этилгенди. 

Докладчы бир сейир шартны да туура этгенди. Жашырынлыкъда бардырылгъан конференцияны кезиуюнде къоркъуусузлукъну жалчытыр ючюн бир да болмагъанча къаты мадарла этилгендиле. Анга уа бизни республиканы Къырал къоркъуусузлугъуну управлениясында къуллукъ этгенле да къатышхандыла – битеу да 39 адам. Аланы араларында капитан Магомед Хажумарович Бгажноков да болгъанды. Аны жашаууну бла къуллугъуну юсюнден жыйылгъанлагъа Мухаммед Хафицэ билдиргенди.

М.Х.Бгажноковну юсюнден дагъыда  «Адыгэбзэ Хасэ» биригиуню таматасы Мурат Табишев, КъМР-ни культурасыны сыйлы къуллукъчусу, китапхананы бёлюмюню таматасы Зарема Серекова, Бахсан эм Зольск районлада аскер комиссар Мухамед Сосналиев сейир да, толу да хапар айтхандыла. 

Жигитни жашы Валерий Бгажноков а къонакълагъа, тюбешиуню къурагъанлагъа да жюрек ыразылыгъын билдиргенди. Ол атасыны юсюнден эсгериулерин да туура этгенди.

Тюбешиуге келгенле Уллу Хорламны 75-жыллыгъына жораланнган китап  эмда сурат кёрмючлеге уллу эс буруп къарагъандыла. Ол кюн къонакълагъа Ялтадагъы конференцияны юсюнден документли фильм да кёргюзтюлгенди.