Сынамлы волонтёрла жаш коллегаларын юйретгендиле

Кёп болмай Къабарты-Малкъар къырал университетде «Слёт добровольцев КБР» деген ючкюнлюк билим бериу форум болгъанды. Анга  школлада  бла ссузладада окъугъан 250-ге жууукъ адам къатышханды. Аны жаш коллегаларыны билимлерин ёсдюрюрге, ол санда къыйын болумланы  кезиуюнде бла саулукъларында чекленнген онглары (ОВЗ) болгъанлагъа   биринчи медицина болушлукъ берирге юйретирча   КъМКъ-ну  Волонтёр арасы къурагъанды, деп билдириледи вузну пресс-службасындан.  

Сакъат сабийле  бла адам кесин тюз  къалай  жюрютюрге кереклисини юсюнден  юйюр врач-психолог,  «Инклюзив» коммерциялы болмагъан организацияны таматасы Светаланы Карнач билдиргенди. Бу жаны бла  культура-жарыкъландырыу программала ишлегенлерин, аланы  чеклеринде ала тигиуден башлап аш этгеннге дери, жашау этерге  жарарыкъ  кёп затха юйренгенлерин да  айтханды.

- Биз жангыдан велосипед ишлемейбиз, жаланда  бюгюнлюкде болгъан жетишимли техникаланы хайырланабыз. Аны бла бирге   психологланы, неврологланы, педагогланы эм ата-аналаны   да  бу жаны бла ишлеринде болушурча  программала къурайбыз  эм,  биринчиден,   проблемагъа   комплекс халда къараргъа тийишлисин унутургъа жарамайды,  дейди врач-психолог. 

КъМР-ни  Жарыкъландырыу, илму эмда жаш тёлюню ишлери жаны бла министерствосуну специалисти Мурачаланы Исхакъ а  жаш адамлагъа грант хорларча    иги социал проект къураргъа юйретгенди.   КъМКъУ-ну  волонтёр-медиклери уа къыйын болумланы кезиуюнде биринчи болушлукъ бериуден  мастер-классла бардыргъандыла. 

Форумну экинчи кюнюнде  уа  Волонтёр ресурс араны таматасы Татьяна Алексейчик бла КъМКъУ-да  бу тебиуню башчысы Раида Мирзоева ишлерини юсюнден хапарлагъандыла.   Ызы бла жыйылгъанла «Мен –доброволецме» деген киногъа къарагъандыла. Ахырында уа  слётха  къатышханланы  барысына да «Проект ишле», «Биринчи болушлукъ»   курсланы ётгенлерине эмда форумгъа  къатышханларына  шагъатлыкъ къагъытла берилгендиле. 

 

Магометланы Сулейман.
Поделиться: